GIPAHIBALO sa Department of Education (Deped) nga ang pag-abli sa klase sa mga pampublikong tunghaan sa tibuok nasod alang sa school year (SY) 2025-2026 magsugod na karong Hunyo 16, 2025, sumala sa gilatid sa DepEd Order 12, Series of 2025.
Ang pagbalik sa pre-pandemic academic calendar molungtad hangtod sa Marso 31, 2026.
Ang enrolment ug mga kalihokan sa Brigada Eskwela mahitabo gikan sa Hunyo 9 hangtod 13, usa ka semana sa dili pa ang opisyal nga pagbukas sa klase.
Ang mid-school year break naka-iskedyul sa kataposang semana sa Oktubre ug holiday break sa katapusang duha ka semana sa Disyembre. Ang klase mobalik sa unang semana sa sunod tuig 2026.
Ang pagbalik sa old school calendar giaprubahan ni Pres. Ferdinand Marcos Jr. niadtong Mayo sa miaging tuig human sa daghang isyu nga nitumaw nunot sa pag-usab sa SY sa Agusto. (RTB)
