GILUBONG na kagahapon si Santo Papa Francis sa Vatican diin midagsa ang nagkadaiyang mga lider ug mga presentante sa mga kanasuran sa kalibotan alang sa ilang kataposang pagyukbo sa lider sa Simbahang Romano Katoliko.
Gani apil sa mitambong sa lubong mao silang Presidente Ferdinand Marcos Jr. ug kapikas nga si First Lady Liza Marcos. Apil si US President Donal Trump ug daghan pang uban ilabi gikan sa Uropa.
Ang lawas ni Pope Francis gipahiluna sa Santa Maria Maggiore ug haom kini matud pa nga didto siya gilubong tungod kay matag gikan kini sa biyahe sa laing lugar, modiretso kini dayon sa maong simbahan aron mag-ampo. Ang maong simbahan usa sa upat ka mga Major Basilicas sa Roma.
Ang maong simbahan mao ang pinakaunang simbahan nga gitukod niadtong ika-upat nga siglo pahinungod sa Birhen Maria diin usa ka deboto ang Santo Papa.
Sa laing bahin, ang mga Pilipinong Cardinal milarga na sab sa Vatican aron sa pagtambong sa lubong ni Pope Francis kagahapon Sabado.
Ang mga Cardinal naglangkob nila ni Pablo Virgilio Cardinal David ug Jose Cardinal Advincula.
Human sa lubong, ang tulo moapil sab nila sa Conclave of Cardinals nga mabotohay aron mopili og bag-ong Santo Papa. Si Luis Antonio Cardinal Tagle daan nga nag-una kay didto naman siya sa Vatican nadestino.
Si Tagle maoy nangulo sa recitation sa Rosary alang sa kapahulayan nga dayon ni Pope Francis sa Basilica of St. Mary Major sa Vatican City.
Kaniadtong hapon,sa adlaw nga Biyernes, gipangulohan ni Arcbishop Jose Palma uban sa mga kaparian sa Archdiocese of Cebu ang Santos nga Misa alang kang Pope Francis sulod sa Cebu Metropolitan Cathedral nga gitambongan sa mga Sugbuanong magtutuo.
Gipasalamatan sa arsobispo ang mga nahimo Santo Papa sa simbahan ug giampo usab ang kapahulayan nga dayon niini. (RTB)
