GIANDAM nang daan na sa Police Regional Office (PRO) 7 ang mga police personnel nga gipakatap alang sa pagsugod sa kampanya sa local nga mga kandidato kaniadtong Biyernes, Marso 28, 2025.
Matod ni Police Brigadier General Redrico Maranan, ang hepe sa PRO 7 nga sa miaging tuig pa sila nakaandam uban sa Commission on Election ug sa Armadong Kusog sa Pilipinas.
Nakalusad na sila og lima ka Regional Joint Security Control Center meeting sa pagpangulo sa Comelec 7 aron i-assess ang sitwasyon sa tibuok rehiyon subay sa oagsugod na sa lokal nga kampanya.
Awhag ni Maranan sa mga kandidato nga sundon lang ang lagda sa Comelec ug ang tanang batakang balaod sa Pilipinas aron makab-ot ang malinawon, hapsay ug matinud-anon nga piniliay sa Mayo 12, 2025.
Samtang, gi-monitor sa PRO 7 ang gihimo nga mga programa sa mga supporter ni kanhi Presidente Rodrigo Duterte sa maong adlaw nga naatol sa pagsaulog sa ika 80 nga adlaw’ng natawhan sa nauwahi. (RTB)
