ANG Bohol nagpadayon sa pagpalig-on sa iyang pasalig sa tawhanong katungod ug katilingbanong proteksyon, nga nakaangkon og pag-ila alang sa iyang anti-trafficking ug anti-violence initiatives.
Niini, ang probinsiya gihatagan ug Plaque of Recognition tungod sa pagkab-ot sa High Functionality Level sa Local Committee Against Trafficking-Violence Against Women and their Children (LCAT-VAWC) para sa tuig 2024.
Ang pag-ila gihatag sa Inter-Agency Council Against Trafficking 7 – Violence Against Women and Their Children (IACAT7-VAWC) Region VII atol sa Regional Culminating Activity sa National Women’s Month niadtong Marso 27, 2025, sa dakbayan sa Sugbo.
Ang pasidungog nagpasiugda sa dili matarug nga pasalig sa Bohol ubos sa pagpangulo ni Gobernador Aris Aumentado sa pagpanalipod sa katungod ug kaayohan sa kababayen-an ug kabataan.
Nahiuyon usab kini sa Strategic Change Agenda sa Bohol, nga nagtutok sa inklusibo nga pagdumala, proteksyon sa katilingban, ug malungtarong kalamboan.
Ang taas nga lebel sa pagpaandar sa LCAT-VAWC nagpasiugda sa epektibong mga palisiya sa probinsya, estratehikong mga programa, ug lig-on nga koordinasyon sa mga hingtungdan aron mabuntog ang human trafficking ug gender-based violence.
Ang plaque of recognition gipirmahan ni Graeme June Elmido, Regional Prosecutor sa Department of Justice Region 7; Shalaine Marie Lucero, Regional Director sa Department of Social Welfare and Development Region 7; ug Leocadio Trovela, Regional Director sa Department of the Interior and Local Government Region 7.
Isip una ug bugtong UNESCO Global Geopark ug Regenerative Island sa Pilipinas, gipalig-on niini ang dedikasyon sa probinsiya dili lang sa pagkonserba sa kinaiyahan ug malungtarong turismo kondili sa pagpanalipod ug paghatag gahum sa katawhan niini.
Kalabot niini, si Second District Board Member Atty. Jamie Aumentado Villamor niduso og ordinansa nga nagdili sa online abuse ug exploitation sa mga bata.
Ang gisugyot nga ordinansa giaprobahan na sa ika-29 nga session sa Sangguniang Panlalawigan atol sa ikaduhang pagbasa niini.
Uban sa pasidungog, nagsilbi kini nga testamento sa proactive nga baruganan sa Bohol sa pagtubag sa mga kritikal nga isyu sa katilingban ug pagsiguro sa luwas, inklusibo, ug progresibong komunidad para sa tanan. (RTB)
