NAPULO ka kapunungan sa mga mag-uuma sa Bilar ang nakadawat sa mga kahimanan sa pagpanguma, atol sa gipahigayon nga seremonya niini, didto sa Bilar Cultural and Sports Center, Bilar, Marso 27.
Gipanguluhan ni Gobernador Aris Aumentado ang pag apod-apod sa mga baril, hose pipes, water pump machines, discharge hose, ug mga hose pipes.
Ang mga kapunungan ug ang representante niini mao ang Bugang Norte-Loctob Irrigators Association-German Anub, Bugang Norte Farmers Association- Tito Ancog, Cambigsi Farmers Association-Julie Adlao, United Rice and Livestock Growers Association-Kevin Jay Hilot, Danao Sawite Irrigators Association Inc.-Francisco Bojo, Riverside Agriculture Cooperative-Alona Dordan, Rizal Farmers Association-Olimpio Halasen, Subayon Integrated Farmers Association-Dexter Lomon, Tinugdan Rice and Vegetables Farmers Association-Florencio Doria ug Yanaya Irrigators Credit Cooperative-Jose Jale.
Ang Executive Assistant sa Gobernador ngadto sa Office of the Agriculturist (OPA), nga si Ricardo Oblena, namahayag sa dakong pasalamat ngadto sa Gobernador sa makusganon niini nga tinguha pagpalambo sa agrikultura sa lalawigan.
Ang pagpanghatag sa mga kahimanan sa pagpanguma, kabahin sa Strategic Change Agenda sa administrasyon sa tumong niini, pagbaton og usa ka climate smart agriculture.
Gipadayag sa Gobernador ang kabalaka nga nagkaanam og kagamay ang gidaghanon sa mga mag-uuma, gumikan kay nangamatay na ang uban kanila. Kasagaran sa mga kasamtangan nga mga mag-uuma, edaran na ug masakiton. Talagsa ra ang mga batan-on nga misagop sa maong bokasyon.
Gidasig niini ang mga mag-uuma sa padayon nga pagpanguma ug gipaniguro niini nga ang Kagamhanang Probinsyal andam pagsuporta alang sa kalamboan sa sektor sa mga mag-uuma.
Matud pa kini ang hinungdan nga kanunay nga adunay interventions ang Kapitolyo para sa mga mag-uuma, kung daotan ang panahon ug ilabina kaniadtong adunay El Niño.
Ang climate-resilient irrigation intervention para sa mga mag-uuma pinaagi sa OPA, gisugdan sa buwan sa Marso diin benepisyaryo niini ang 402 ka mga asosasyon sa mga mag-uuma sa Bohol.
Gawas sa napulo ka mga kapunungan sa Bilar nga nakabaton sa abag sa pagpanguma, ang Kagamhanang Probinsyal, nakapanghatag na usab sa mga kapunungan sa mag-uuma sa Garcia Hernandez kaniadtong Marso 26, Carmen niadtong Marso 25 ug sa Sevilla kaniadtong Marso 21. (RTB)
