UPAT ka buhatan ang nagtambayayong ubos sa direktiba ni Gobernador Aris Aumentado pagpahigayon sa seremonya sa pagtunol sa mga suporta gikan sa Kagamhanang Probinsyal sa Bohol, ngadto sa mga senior citizens ug mga asosasyon.
Mikabat sa P2,400,000 ang kinatibuk-ang pondo nga gipagawas ni Provincial Treasurer Eustaquio Socorin uban sa pagpahiluna sa Office of the Provincial Social Welfare and Development (OPSWD) head Carmelita Tecson, diin kantidad og tag P50,000 ang nadawat sa 47 ka mga municipal federations sa senior citizens sa lalawigan ug laing P50,000 alang sa Dakbayan sa Tagbilaran senior citizen federation.
Gipadangat sa Presidente sa Bohol Federation of Senior Citizens Associan of the Philippines (BFSCAP) Alvaro Gujol ang mga pagpasalamat ngadto sa Kagamhanang Probinsyal sa liderato ni Aumentado sa mainitong suporta niini ngadto sa mga edaran.
Kahinumduman nga sa miaging tuig, adunay tag P40,000 nga gipanghatag usab ang administrasyon ni Aumentado isip suporta pagpalambo sa kalihukan sa mga senior citizen apan matud pa sa Gobernador nga mas sakahan pa kini kung kaigo sa pondo isip pasidungog sa kontribusyon niining maong sektor ngadto sa lalawigang Bol-anon.
Gipanguluhan usab sa Gobernador ug ni Provincial Administrator Asteria Caberte uban kanila ni Board Member Lucille Lagunay ug Board Member Nathaniel Binlod ang pagpasidungog ug pagtunol sa gasa sa Kapitolyo alang kang Dioscora Ligason, sa Brgy. Bool, Tagbilaran City, sa iyang pagtungtong og usa ka gatus nga panuigon ayha kini mitaliwan. Gidawat ang kantidad P100,000 nga centenarian cash gift sa mga kaliwat niini nga sila si Hildelita ug Adelaide Ligason.
Ang maong pasidungog subay sa Sangguniang Panlalawigan Resolution No. 2025-009, pag-ila kang Ligason nga kwalipikado isip usa ka centenarian ug sa Ordinance No. 2022-003.
Sa laing bahin, uban sa Provincial Health Office (PHO) head Dr. Fruserma Mary Uy, gitugyan sa Gobernador ngadto sa mga lideres sa Senior Citizens ang mga tambal ug bitamina nga gigahin para ning maong sektor.
Tinguha sa Gobernador nga matutukan ang panlawas sa mga edaran, isip pagtahod kanila ingun nga mahinungdanong haligi sa komunidad.
Sa Facebook page sa Gobernador matud pa niini,”Isip piniyalan ug alagad sa lalawigan, kalipay nato nga ikabalik ngadto sa mga Bol-anon ang buhis gikan sa katawhan.
Dili man kita perpekto apan sa kanunay, andam kita sa pagpaminaw sa tingog sa atong nagkadaiyang sektor, kay kita naagtuo nga ang dakong kalamboan nagagikan sa hiniusa nga pagtinabangay.”
Samtang sa laing bahin, 19 ka mga asosasyon ang nakadawat usab nianang adlawa didto sa Kapitolyo sa ayuda alang sa ilang pagatukuron nga alternatibong panginabuhian, diin mikabat ang kinatibuk-ang kantidad og P6,469,630.
Matud sa Provincial Cooperative and Development Office (PCDO), ang maong mga kapunungan nakalampos sa tanang mga pagbansay isip preparasyon aron maayo nilang madumala ang ayuda gikan sa Kagamhanan.
Nagkantidad og P501,306 ang nadawat sa duha ka kapunungan sa Distrito Uno, P839,204 sa tulo ka kapunungan sa Segundo Distrito ug P5,129,120 ang nadawat sa 14 ka mga kapunungan sa Tersero Distrito.
Bisan taliwala sa hulga sa ASF, mas gipili sa mga kapunungan ang negosyo kabahin sa pagpamuhi og baboy diin 8 ka mga asosasyon ang naaprobahan ang project proposal niini, 5 sa farm machineries, 3 sa mga panginabuhi sa kadagatan, 1 alang sa pagpanahi, 1 sa vending ug usa sa pagtukod og tindahan.
Giawhag sa PCDO head Conrada Fuentes ang mga benepisyaryo nga paningkamutan ang paglampos sa negosyo sa ilang asosasyon aron mas daghan pa nga tabang ang ipiyal kanila kung makita nga sila kasaligan. Katimbang ni Fuentes sa maong programa si EA Romy Teruel ug EA Gil Bongato.
Si Aumentado sa laing bahin nagkanayon nga limitado ang pondo sa gobyerno, busa gipili ug gitun-an gayod kung kasaligan ba ang maong mga kapunungan nga gihatagan sa kapital, kay tumong niini nga mas pakunhuran pa ang poverty incidence sa lalawigan.
Malaumon ang Gobernador sa matinud-anon nga kooperasyon sa mga benepisyaryo sa mga benepisyaryo, kabahin sa tumong niini nga pagpalambo sa kahimtang sa katawhan sa Bohol isip nag inusara nga UNESCO Global Geopark sa nasod. (RTB)
