PORMAL nang milagda si Gobernador Aris Aumentado sa usa ka Memorandum of Understanding (MOU) isip representante sa Kagamhanang Probinsyal tali sa Institute for Climate and Sustainable Cities (ICSC) nga girepresentahan ni Angelo Kairos Dela Cruz, ICSC Executive Director, didto sa Kapitolyo.
Si Dela Cruz nagkanayon, “The signing of the MOU, I think is the first step to set the the framework of cooperation between the Provincial Government of Bohol and the ICSC.”
Kahinumduman nga ang ICSC mibisita sa Kapitolyo tuig 2024, diin giabiabi kini sa Chief of Staff, Atty. Filipina Piollo ug mga Department Heads gumikan kay adunay laing kakulian ang Gobernador.
Isip eksperto sa teknikal nga kahibalo kabahin sa Policy Development and Planning, gipadayag niini ang intensyon sa pagtabang ngadto sa Bohol pinaagi sa teknikal expertise niini.
Abril 2024, misuwat ang Gobernador ngadto sa ICSC ug adunay siyam ka tumong nga tinguha sa Kagamhanang Probinsyal nga makab-ot uban sa ICSC sibo sa expertise niini, nga mao ang; mga pagbansay sa 47 ka munisipalidad ug usa ka Dakbayan, kabahin sa Greenhouse Gas Inventory (GHG), diin kini mahinungdanong bahin sa Enhanced Local Climate Change Action Plan (eLCCAP) sa mga local government units; posibleng pagpalapad sa urban development sa Dakbayan ug silingang mga lungsod; posibleng suporta pagpalambo sa mass transport system sa lalawigan; pagpahiluna sa local energy plan sa pagtambayayong sa Bohol Renewable Energy Board; suportang teknikal sa Bohol Investment Board pagsubay sa mga proyektong renewable energy; pagpalapnag sa kahibalo kabahin sa renewal energy transition; suporta pagpahigayon sa Green Energy Option Program (GEOF) workshop; giyang teknikal sa plano pag-instalar sa mga solar panels sa Kapitolyo; giya kabahin sa implementasyon sa Energy Virtual One Stop Shop (EVOSS).
Usa ka Resolusyon Numero 2025-149 ang gipalabang sa Sangguniang Panlalawigan Pebrero 18, 2025 nga naghatag og otoridad kang Gobernador Aris pagpirma sa MOU uban sa ICSC, sa pagmugna og hiniusang tumong alang sa malahutayon nga kalamboan sa Bohol isip usa ka climate resilient province
Gilauman sa Gobernador nga pinaagi sa maong pagtambayayongay makabaton ang Kagamhanang Probinsyal og usa ka lig-on nga policy development and planning sibo sa Strategic Change Agenda sa administrasyon, pinaagi sa suporta sa technical expertise sa ICSC.
Si Dela Cruz mibutyag nga ang ICSC isip usa ka Philippine-based non-governmental organization, nga naka-base sa Quezon City, kasamtangan nakadawat og daghang hangyo nga ipaambit ngadto sa mga institusyon o organisasyon ang ilang technical expertise, apan mas gipili niini ang Bohol gumikan sa potensyal nga mga oportunidad sa hiniusang pagtambayayongay ug pag-institutionalize sa maong proyekto.
Si Aumentado mapasalamaton sa ICSC sa maong suporta alang sa balanse nga lakaw sa ekonomiya, apan mas gipakusgan nga pagpreserba ug pagpanalipod sa kalikopan.
isip usa ka UNESCO Global Geopark Regenerative Island Province, buot sa Gobernador nga sa mga oportunidad sa kalamboan apil nga ginakonsiderar ang paggamit sa mga alternatibo nga walay daotang epekto sa kalikopan.
Ang MOU Signing Ceremony gipanguluhan sa Gobernador uban ni Bokal Nick Besas, Provincial Administrator Asteria Caberte, Chief of Staff Atty. Filipina Asoy-Piollo, hepe sa BPEMO Jovencia Ganub, hepe sa PPDO Atty. John Titus Vistal, hepe sa BEDIPO Ma. Fe Dominise, BPTO OIC Joanne Pinat, uban ni Maria Golda Hilario, ug Danica Supner mga directors sa ICSC, Mel Matthew Doctor, Energy Policy Manager ug Sean Gabriel Alger Communications Officer sa ICSC.
Ang nahisgutang MOU mulungtad sulod sa tulo ka tuig gikan sa pag-epekto niini. (RTB)
