MALAMPUSONG giinagurahan ang lima ka planta sa walo ka generator sets sulod sa duha ka adlaw nga pagpangbisita ngadto sa lima ka Isla, nila ni Gobernador Erico Aristotle Aumentado; Kongresista sa Segundo Distrito Van-van Aumentado; BM Atty. Jiselle Rae (Jamie) Aumentado Villamor-Tan, PCL President Nick Besas, ug LMP President Fernando Estavilla.
Marso 11 ug 12, uban sa nahisgutang mga personalidad, gipahigayon ang pormal ug opisyal nga Ceremonial Switch-On niini, dinuyugan sa mga opisyales sa National Power Corporation (NPC) pinanguluhan ni Fernando Martin Y. Roxas, Presidente ug CEO-NPC; Rene B. Barruela, Bise Presidente-Small Power Utilities Group (SPUG); Vicente Melencion, Ubay Area Manager BOHECO-II; LGU-Bien Unido pinanguluhan ni Mayora Rene Borenaga ug mga hingtungdang kapitanes sa Isla Sagasa, Maomawan, Malingin, Hingotanan East ug West sa Bien Unido ug Isla Gaus sa Pres. Carlos P. Garcia.
Sa unang adlaw ning maong kalihukan, ang Diesel Power Plant (DPP) sa Isla Sagasa diin adunay usa ka 2X30kW nga generator set (gen set), para sa 293 ka panimalay ang unang gipasiga. 205 niini andam na alang sa indibidwal nga linya sa kuryente. Ang kalihukan gisaksihan sa barangay nga gipanguluhan ni Kapitana Rufa Evaloraza.
Gisundan kini sa Isla Maomawan sa gen set nga 1X30kW ug 1X20kW para sa 292 ka panimalay ubos sa liderato ni kap. Bernardita Pagal, diin tanan kanila andam na ang linya pagpataod sa kuryente; ug ang Isla Malingin ubos sa pagdumala ni Kapitan Arne Nellas, nga adunay gen set 2X30kW para sa 314 ka panimalay nga andam na tanan magpataod og kuryente.
Sa Marso 12, unang gipasiga ang Isla Gaus uban ang gen set niini nga 1X30kW ug 1X20kW para sa 268 ka panimalay ubos sa pagdumala ni Kapitan Dicula Auguis kansang 155 niini aduna na’y linya para pagpataod og kuryente.
Sa laing bahin, giinagurahan usab sa Isla Gaus ang P7,452,883,36 Solar Powered Desalination Plant for Potable Water Supply, pondo gikan sa Kagamhanang Probinsyal.
Katapusan nga giinagurahan ang DPP para sa Isla Hingotanan diin aduna kini gen set nga 1X199 ug 1×75 para sa 715 ka panimalay sa East ug West, diin 286 niini aduna nay mga linya ubos sa pagdumala ni Kapitan Leodelino Paden sa West ug. Kap Boy Mabalatan sa East.
Ang lima ka Isla nga napasiga ubos sa liderato ni Gobernador Aumentado kabahin sa walo ka Isla nga pasigaon apil ang Isla Cataban, Talibon; Bilangbilangan, Bien Unido ug Pandanon, Getafe sa pondo nga 85 MILYONES electrification project sa Nasudnong Kagamhanan.
Kahinumduman nga nauna nang gipangayo ni anhing Gov. Erico Boyles Aumentado ang maong proyekto sa pangagamhanan, diin gipadayon ni Congresswoman Van-van isip kasamtangang Kongresista sa Segundo Distrito ang nasugdan paglihok ni Gobernador Aris sa panahon nga Kongresista pa kini.
Makusganon nga gisuportahan ni Kongresista Van-van ang mga proyektong pang-imprastraktura, edukasyon ug panlawas sa Gobernador diin matud pa niini, sa kwarta ug buhis sa katawhan gikinahanglan nga ang mga proyekto matagamtaman usab sa publiko. Gipahibalo usab sa kongresista nga aprobado na sa Kongreso ang economic zone nga iyang giduso para sa Segundo Distrito ug anaa na kini ubos sa paghukom sa Senado.
Sa laing bahin, si Board Member Jamie human masayod nga adunay dokomento nga gikinahanglan alang sa hingpit nga implementasyon ning maong proyekto mipalabang sa Res. No. 2025-227 pagduso ngadto sa NPC nga pasigaon na ang pito ka Isla ug laing Res. No. 2025-228 pagduso sa Isla Pandanon nga mahiapil sa maong electrification program.
Samtang ang NPC maoy mihatag ug mipahiluna sa mga planta, papel sa BOHECO ang pagpahigayon sa mga linya aron makabaton sa kuryente ang katawhan, apan tungod sa bagyong Odette naguba ang tanan nga ilang na-instalar busa si Gobernador Aris mimando sa Sangguniang Panlalawigan pagpalabang sa balaod pagpagawas sa pondong 3 Milyones suporta sa panginahanglanon sa tanang benepisyaryo sa proyekto aron mapadayon ang maong kuryente .
Ang NPC buot mudugang og mga planta ning maong mga Isla gumikan matud pa adunay ekonomikanhong potensyal kini nga mas mulambo kung suportahan.
Gihangyo sa mga tinugyanan sa BOHECO nga magpataod na og kuryente ang mga islahanon ug pahimuslan ang programa, diin makabaton ang mga residente og kuryente sulod sa walo ka oras matag adlaw isip pasiuna nga operasyon.
Tinguha sa Gobernador nga ikahatag sa kaislahan ang nag-unang mga panginahanglanon sama sa tubig, kuryente, imprastraktura , de kalidad nga edukasyon ug alternatibong kita isip paagi paghaw-as ning 24 ka mga lungsod gikan sa kapobrehon sumala sa taho sa Philippine Statistic Authority (PSA). (RTB)
