NAG-ATUBANG og tulo ka ihap sa kasong graft and corruption si Bokal Mimi Boniel-Maglasang sa Segundo distrito tungod sa giingong paggamit sa pundo sa gobyerno sa paggasolina sa iyang pribadong sakyanan.
Si Board Member Dionisio Joseph ‘DJ’ Balite maoy nisang-at sa reklamo batok kang Maglasang atubangan sa Office of the Ombudsman- Visayas, nga nakakaplag ug probable cause sa maong reklamo.
Sumala sa 12 ka pahina nga complaint affidavit ni Balite, ang tulo ka ihap sa graft and corruption naglakip sa: A. Paglapas sa Article 217 sa Revised Penal Code: Malversation of Public Funds and Property; B. Paglapas sa Seksyon 3(a) sa RA 3019: Paggamit sa pundo sa publiko o kabtangan para sa pribadong ganansya; C. Grave misconduct ug/ o grave dishonesty.
Gidetalye sa affidavit nga giingong gigamit ni Maglasang ang Fuel Withdrawal Slips nga gi-issue sa Kapitolyo sa pagpatubil sa iyang pribadong sakyanan sa tulo ka higayon, nga gipresentar ngadto sa Cevic Trading, Inc., ang tag-iya ug operator sa Shell Gasoline Station nga nahimutang sa 0876 H. Zamora Street, Barangay Dao, dakbayan sa Tagbilaran.
Sumala sa pamaagi, ang usa ka husto nga nahimo nga Fuel Withdrawal Slip kinahanglan ipresentar ngadto sa supplier sa dili pa ang gasolina ihatag ngadto sa usa ka sakyanan sa gobyerno.
Ang unang insidente nahitabo niadtong Abril 28, 2024, dihang ang drayber sa respondent nga si Jhomar Tac-an, nipresentar og Fuel Withdrawal Slip nga gituyo alang sa Mitsubishi Estrada nga gipanag-iya sa gobyerno nga adunay plate number nga SKY 366 nga maka-withdraw og 54 ka litro nga gasolina.
Apan, ang respondent, pinaagi sa iyang drayber, niinsister nga ang gasolina ibutang sa laing sakyanan nga adunay plate number/conduction sticker nga F4X075 imbes sa sakyanan sa gobyerno nga SKY 366.
Ang ikaduhang insidente nahitabo niadtong Abril 29, 2024, dihang ang respondent pinaagi sa laing drayber nga si Roel Caturza, mipresentar og Fuel Withdrawal Slip nga gituyo alang sa SKY 366 aron maka-withdraw og 40 ka litro nga gasolina.
Sa makausa pa, ang respondent niinsistir nga ang gasolina ibutang sa pribadong sakyanan inay sa sakyanan sa gobyerno.
Ang ikatulong insidente nahitabo niadtong Mayo 5, 2024, sa dihang ang 60 ka litros nga gasolina giingong gi-dispenso ngadto sa usa ka non-government vehicle.
Dugang pa sa affidavit ni Balite nga ang mga personahe sa supplier misukitsukit sa respondent kon nganong gisulod sa pribadong sakyanan ang gasolina.
Giingong gipasabot ni Maglasang nga wala mag-function ang iyang sakyanan nga gi-isyu sa gobyerno hinungdan nga mi-insister siya nga ang gasolina nga gigahin alang sa SKY 366 gamiton alang sa iyang pribadong sakyanan.
Human sa duha ka mga buwan, ang Ombudsman nimando sa respondent nga mosumiter og counter-affidavit isip tubag sa mga kaso nga gipasaka batok kaniya. (RTB)
