MIKABAT sa P1,050,000 ang giapod-apod ni Gobernador Erico Aristotle Aumentado, ngadto sa mga magbabababoy sa barangay Buenas Aires, Carmen; Nueva Vida, Carmen; La Suerte Pilar; Poblacion Sur, Batuan ug Poblacion Norte, Batuan, atol sa gipahigayon nga pag apod-apod sa Aid to Individuals in Crisis Situation (AICS) gikan sa Kapitolyo pinaagi sa Office of the Provincial Social Welfare and Development (OPSWD) karong bag-o..
Matud ni Carmelita Tecson, hepe sa OPSWD, nga nagkantidad og P10,000 ang nadawat sa mga magbabababoy nga benepisyaryo sa AICS diin 14 niini gikan sa La Suerte, Pilar; 7 sa Buenas Aires, Carmen; 4 sa Nueva Vida, Carmen; 22 sa Poblacion Sur, Batuan; ug 58 sa Poblacion Norte, Batuan.
Pagdugang ni Tecson nga usa kini ka inisyatibo sa Kagamhanang Probinsyal sa liderato ni Gobernador Aris Aumentado, pagpadangat og tabang ngadto sa indibidwal nga misinati og krisis sa kinabuhi gumikan sa mga kalamidad ug uban pa nga nakadaot sa panginabuhi.
Si Aumentado nagpasalamat ngadto sa tanang naapektuhan ang panginabuhi, sa ilang pagkooperar sa mga lakang nga gihimo sa Kagamhanang Probinsyal pagsumpo sa maong sakit sa baboy.
Miapela si Aumentado sa mga benepisyaryo sa maong AICS sa pagtinabangay ug pagseryoso sa mga pahimangno, pagpanalipod sa hog industry sa lalawigan.
Si Aumentado nagkanayon nga samtang dili pa ikabalik ang ilang naandan nga panginabuhi, ipadala sa Gobernador nganha kanila ang Provincial Cooperative Development Office (PCDO), aron mutabang pag-organisar sa mga magbabababoy nga naapektuhan ang panginabuhi.
Tumong niini nga masuportahan ang maong mga magbabababoy nga makabaton sa alternatibong kita samtang padayon pa ang Kagamhanang Probinsyal pagpakigbatok sa ASF. (RTB)
