GIPANGULUHAN ni Gobernador Erico Aristotle Aumentado, Kongresista Van-van Aumentado, DILG7 Regional Director Leocadio T. Trovela, ug DILG PD Jerome Gonzales, ang seremonya sa pagtugyan didto sa Barangay Tubog-Camalian, Ubay sa proyekto kansang pondo nagagikan sa Financial Assistance to Local Government Unit (FALGU) sa kantidad nga P49,998,717.45, nga Ubay-San Miguel Concreting Project.
Ang maong 50 milyones nga proyekto diin adunay gitas-on nga 2.827 kilometro, gilapdon nga 5 ka metros ug shouldering nga usa ka metros sa isig ka daplin, milatas gikan sa Barangay Casate Ubay hangtod sa Barangay Corazon, San Miguel.
Gisugdan kini pagtrabaho Hunyo 13, 2024 ubos sa pagdumala sa Provincial Engineering Office (PEO), Provincial Engr. Camilo Gasatan ug NNYU Construction Inc., diin gihuman kini sulod lamang sa 6 ka buwan niadtong Disyembre 9, 2024.
Tukma nga pito ka bulan sukad sa pagsugod sa konstruksyon, gipahigayon ang Blessing and Turn Over ug Ribbon-cutting sa maong proyekto, Pebrero 13, 2025.
Si Jessica Augis sa Barangay Camalian, Ubay, lumulupyo nga nakabenepisyo sa maong kalsada, mainitong nagpasalamat kang Gobernador Aris Aumentado, Kongresista Van-van Aumentado ug sa Nasudnong Kagamhanan nga natubag ang ilang panginahanglan sa maayo nga agianan kay napahimuslan na kini nila karon.
Si Kongresista Van-van Aumentado, kansang proyekto nahisulod sa iyang gidumala nga Segundo Distrito mipasubang nga bisan tuod og dili masulbad tanan nga panginahanglan sa katawhan, apan naningkamot sila sa pagpangita og dugang nga pondo aron mas daghan usab ang maserbisyuhan alang sa paglambo sa katawhang Bol-anon.
Ang Gobernador sa iyang bahin midasig sa komunidad nga magpadayon sa paghiusa ug pagtinabangay. “Ang importante atong tutukan ang atong mga problema sa lalawigan sa Bohol, focus ta sa atong mga trabaho, I hope nga atong ipatunhay ang kalinaw. Timan-i wa mo kalimte naa na kanunay sa among hunahuna ang inyong panginahanglan,” matud ni Gobernador Aris Aumentado.
Sa laing bahin, sa mensahe ni RD Trovela, gipadangat niini ang pahalipay ngadto sa Gobernador, Kongresista ug ubang opisyales sa malampuson nga pagpatuman sa 50 milyones nga proyekto.
Ang maong kalihukan gitambungan ug gisuportahan usab ni DILG PD Jerome Gonzales; San Miguel Mayor Ian Mendez; Vice Mayor Faustino Bulaga; mga Sangguniang Members sa San Miguel; mga membro sa Sangguniang Bayan ug mga kapitanes sa Ubay (kasamtangan nga anaa sa kauluhan ang mayor sa Ubay), uban sa katawhan sa komunidad. (RTB)
