NADAKPAN sa kapolisan sa Valencia Municipal Police Station sa Bohol Police Provincial Office (BPPO) ug Philippine Drug Enforcement Agency (PDEA)-7 ang usa ka 19-anyos nga high value individual regional priority target atol sa ilang buy-bust operation ngadto sa Purok 5, Poblacion Occidental, Lungsod sa Valencia, ning lalawigan sa niaging adlaw.
Nasakmit sa kapolisan gikan sa suspetsado ang 85 gramong shabu nga nikantidad tanan ngadto sa P578,000 ug usa ka kalibre .45 nga pistol ug magazine niini nga adunay lima ka buhing bala.
Kasong kalapasan sa Section 28 sa Akta Republika 10591 kun “Comelec Gun Ban” ug Section 5 ug 11, Article II sa Akta Republika 9165 kun “Comprehensive Dangerous Drug Act of 2002” ang gipasaka batok sa suspetsado.
Sa laing bahin usab, gihingusgan sa Police Regional Office-7 ang ilang kampaniya batok sa ilegal nga sugal diin ilang gitinguha nga mamenosan ang maong ilegal nga kalihokan sa tibuok rehiyon-7.
Si Police Brigadier General Redrico Maranan, direktor sa PRO-7 nipadayag sa importansiya sa pagtubag sa mga krimen ug social issues nga ang rason gumikan sa ilegal nga sugal aron mapalambo ang community safety sa Central Visayas.
Nihimo og heightened surveillance, undercover operations ug collaboration tali sa komunidad ang kapolisan aron pag-ila ug pagpuhag sa illegal betting venues.
Gikan sa Enero 1 hangtud sa 31, 2025 ang PRO-7 nakapahigayon og 594 ka operasyon batok sa illegal gambling diin 1,025 ka tawo apil niini ang mamustahay, ushers ug kolektor.
Samtang niabot sa P125,000 ang kwarta nga pusta ang nakompiska. Ang illegal activities nga gioperasyonan gilangkuban sa hantak ug nagkalain-laing card games, number games, mahjong ug tigbakay. (RTB)
