TAGBILARAN CITY, Bohol (PIA)—Nasukip man unta ang Panglao-Tagbilaran Bus Rapid Transit (BRT) sa Tier 2 sa mga proyekto nga giduso sa Department of Transportation (DOTr) didto sa Advisory Committee Meeting (ACM) pinangulohan ni Bohol Governor Erico Aristotle Aumentado, kinsa maoy tsirman sa Regional Development Council (RDC), may lain nga prayoridad ang usa ka komitiba sa RDC.
Didto sa RDC ACM alang sa Fiscal Year 2026 Technical Budget Consultation niadtong Enero 16-17 didto sa Golden Prince Hotel and Suites didto sa Sugbo, gipadayag sa Development Administration Committee (DAC) sa RDC nga may maayo pa ang monorail system nga ipatuman sa Bohol particular sa mga kalungsuran sa Corella, Alburquerque, Maribojoc agi sa Cortes ug Panglao agi sa Dauis.
Ambisyoso man, ang sugyot nga nagasukad mismo sa DAC, nagpalanog usab sa tingog sa Bol-anon nga si Argeo Melissimo, tsirman sa DAC, kinsa usab mingsugyot sa kagamhanan sa lalawigans a Bohol nga suwatan ang DOTr nga dili una ipatuman ang Panglao Tagbilaran BRT, aron mapa-una ang monorail project.
Si National Economic Development Authority -7 Regional Director Jennifer Bretaña mipasabut nga ang proseso sa regional planning, programming ug budgeting nagsukip sa pagpresentar sa tagsa-tagsa ka mga giparioritize nga proyekto, programa ug mga kalihukan sa matag regional line agencies.
Matud niya, ang tanan nga proyekto, programa ug mga kalihukan nga gipresentar sa tigum, kinahanglang magsuporta sa mga una na nga ngitumbok nga mga proyekto sa Philippine Development Plan 2023-2028, nga nakabase sa Ambisyon 2040, ug maoy gisuportahan sa mga magbabalaod ug mga representantes sa mga Distrito sa Central Visayas.
Gidason usab sa NEDA 7 nga ang mga proyekto, programa ug kalihukan, kinahanglan nga nahasubay usab sa Public Investment Plan sa kahamhanan ug sa Regional Project Investment Program.
Kahinumduman nga ang DOTr nga mga proyekto nga giduso alang sa 2026, kasagaran pagpadugang sa pundo alang sa mga Tier 1 projects niini, sama sa Cebu BRT, ang bag-ong Dumaguete Airport Development Project, ang bag-o nga Cebu International Container Port Project nga mikabat sa P12.9 bilyones.
Sa Tier 2 projects sa DOTr, kini naglakip sa Panglao Tagbilaran BRT ug uban pang mga proyekto sa mga tugpahanan sa rehiyon, lakip na ang Cebu Urban Mass Rapid Transport Central Line nga may ipapundo nga P14.4 bilyones, segun sa RDC.
Sa nagkahuot nga sitasyon sa traffic paingon sa Tagbilaran, daghan usab nga mga Bol-anon ang naglaum nga may himoon ang kagamhanan, ilabi na sa pagpakunhod sa mga sakyanan nga mosulod sa Tagbilaran, kon dili mam kapalapdan pa ug ablihan ang mga proyekto sa dalan pagpa-luag sa trapiko.
Sa monorail project, mahimo nga ang mga nanggimotor nga kasagaran maoy perming naa sa risgo sa uwan ug init, pun-an pa sa mahal nga gasolina, mahimong mas mopili na sa monorail ug makunhoran na ang mga sakyanan nga mosulod sa syudad. (RAHC/PIA_7/Bohol)
