PORMAL nang nagpadala og komunikasyon sa kampo nila Congressman Atty. Edgar M. Chatto ug kanhi city mayor Baba Yap si ‘Tigpanalipod’ ug Aksyon Demokratiko District 1 aspirant Atty. Jordan M. Pizarras arun dunay Joint Press conference ang tanang mga nanglansar pagka kongresista sa Distrito Uno.
Mahitungod kini sa ilang mga nagkadaiyang political platforms sama sa taas nga presyo sa panaliton sama sa isda, unemployment ug kakuwang sa mga oportunidad sa panginabuhian, ubos kaayo nga sweldo, hinay nga internet connection, mahal nga plitehan, pagkuyanap sa ginadiling drogas, kakuwang sa tubig mainom ug uban pa.
Nagpahigayon og press conference si Atty. Pizarras mga semana ang nilabay sukad giimbitar sa inagurasyon ni Pres. Donald Trump sa Amerika pinaagi sa kliyente niya nga Timothy Strong.
Si Strong, usa ka oil ug gas investor ug usa si ‘Tigpanalipod’s sa iyang legal team.
Sa usa ka pangutana sa mga sakop sa media, siya namahayag nga gikinahanglan nga amendahan ang balaud sanglit walay silot nga pinaagi sa ‘Firing Squad’ dinhi sa Pilipinas.
Kini gumikan sa pangutana kon uyon o supak ba siya sa sugyot balaudnon nga giduso ni 1st district Congressman ug karon kandidato pagka mayor sa Dakbayan sa Zamboanga nga si Khymer Adan Olaso nga ipa-Firing Squad ang mga opisyales nga mapatud-ang guilty sa mga kasong korapsyon.
Dugang pa ni Atty. Pizarras, uyon siya sa maayong tumong sa nagpanday niini. (Kahlil Lester O. Camba)
