KINSA man galing ang pili-on sa atong katawhan sa paaging matinud-anon, atong suportahan; hatagag gibug-aton ang pulong nga MATINUD-ANON; buot ipasabot, walay pagpanglingla, walay pagpamalit sa boto, ug walay tikas.
Matud pa ni San Pablo sa 1Timoteo2:1-3, “Giawhag ko kamo, una sa tanan, nga iampo ang mga hari ug tanang anaa sa katungdanan ug tibuok katawhan, aron sila magpuyong malinawon ug hapsay paingon sa pagkabalaan ug pagka-diosnon. Kini ang angayang buhaton kay makapahimuot sa Dios nga atong Manluluwas”.
Ang mosunod maoy atong pag-ampo alang sa tanang presidentiables segun sa ilang ngalan:
Kang Ernesto Abella, kanhi presidential spokesman; nga unta siya mobalik na lamang sa iyang trabaho pagka-pastor;
Kang Leody de Guzman, labor leader; nga unta iyang kumbinsihon ang iyang mga kaubanan sa ilang grupo sa mga laborers nga mas praktikal pa alang kanila ang pagtabang sa laing kandidato nga tiunayng miunong ug nagsilbi sa mga mga kabus kinsa adunay dakung posibilidad nga mopukan sa simbolo sa diktadura, pagpanaugdaug ug pagpangawat gikan sa panudlanan sa gobyerno;
Kang Manila Mayor Isko Moreno Domagoso; nga unta moundang na siya pagpagamit sa dayag nga benefisaryo sa iyang pag-atake sa Bise Presidente ug hinuon iyang atubangon ang mga nagbagang isyu nga naglimin karon sa iyang administrasyon sa Manila City;
Kang Norberto Gonzales, kanhi defense secretary; nga unta iyang hinulsulan ang iyang mga kasaypanan ubos sa administrasyong Arroyo pinaagi sa pag-angkon nga ang maong mga binuhatan supak sa prinsipyong iyang gibarugan nga demokratikanhong sosyalismo;
Kang Senador Ping Lacson; nga unta iya na lang isakripisyo ang iyang garbo ug motabang na lang paghiusa sa mga pwersang sarang makapukan sa pwersa sa pagpangawat ug korapsyon;
Kang Faisal Mangondato; nga unta mounong na lamang siya sa iyang kaigsoonang Muslim sa pagtabang sa kandidatong ilang giindorso;
Kang Ferdinand “Bongbong” Marcos Jr., kanhi senador; nga unta siya makaamgo nga panahon na aron iyang atubangon ang kamatuoran ug hatagan ang katawhang Pilipinhon sa kahigayonan pagmata gikan sa ilusyon nga gimugna sa Cambridge Analytica, Facebook, Tiktok, ug Youtube nga nakalingla kanila; ug likayan ang grabeng gaba nga mahiaguman sa iyang pamilya ug kaliwatan sa umaabot;
Kang Jose Montemayor Jr.; nga unta iya na lamang ipahulam ang iyang kaalam ug kalantip isip abogado ngadto sa tiunayng nagsilbi sa mga kabus ug pwersa sa kaayo nga ang bugtong katuyuan mao ang pagluwas sa demokrasya ning atong nasud;
Kang Senador Manny Pacquiao; nga unta siya makaamgo nga aduna pa siyay igung kabaskog, kabatan-on ug bahandi, ug mahimo pa siyang molangsad pag-usab pagka-Presidente, ug isakripisyo una pagkakaron ang iyang ambisyon aron masiguro ang kadaugan sa pwersa sa kahayag ug pagbuntog sa pwersa sa kangitngit;
Kang Bise Presidente Leni Robredo; nga unta, lakip ang ubang kandidato, panalipdan sila sa Kahitas-an, ug siya hatagan sa igung kusog ug kalig-on aron mangulo sa atong katawhan ngadto sa masanag nga kaugmaon ug ang iyang mga maayong panglantaw, nasulayan nang mga maayong binuhatan ug prinsipyo makapalingkawas sa mga kabus ug nag-ilaid nga maoy mayoriya sa katawhang Pilipinhon.
Kini atong giampo sa ngalan sa atong Ginoong Hesu Kristo. Amen. Hinaut pa unta. Ig-ampo usab nato ang malinawon ug hapsay nga piniliay sa lungsod sa Valencia diin misalga ang atong suod nga higala ug publisher nga si Dr. Neil Balite. Viva, Señor San Jose!
