TAGBILARAN CITY, Bohol (PIA)—Human makahimo og paglusad sa Grab Car ug Grab Food deliveries sa Bohol isip dinali-an nga solusyon sa paglalabi sa ubang mga transport operators sa pagkobra og mahal nga pletehan sa mga turista ug mga local nga manakayay, gipaambit sa opisyal sa Bohol ang lain nga laraw nga magpalapad sa serbisyo sa panakyanan, gamit ang trikes.
Didto sa paglusad sa Grab Philippines sa kapin sa 40 ka unang napalusot nga applications sa Grab Car nga mahimong matawag na sa mga manakayay, gipadayag ni Gobernador Erico Aristotle Aumentado nga iyang tigumon ang mga mayor sa Tagbilaran City, Dauis ug Panglao aron sabutan ang posibilidad sa pagpadagan sa Grab Trikes dinhi sa tulo ka mga lugar sa Bohol.
Ang Grab, isip super application platform server, wala may mga gipanag-iya nga mga sakyanan, ang magpailawom sa Grab platform, malista na sa ilang mobile application, nga nanaad sa maki-angayon, luwas nga panakyanan ug barato nga panakyanan.
Una na nga gihangyo sa gobernador niadtong gikaestorya ang Grab uban sa Bohol Chamber of Commerce and Industry niadtong Marso, nga mosulod sa Bohol aron makatabang sa modernisasyon ug sa pagpasugod sa mas baratong kapili-an sa panakyanan.
Matud ni CJ Lacsican sa Grab Philippines, ang tanan nga sakyanan nga sakop sa Grab, mahimo nilang mamonitor ang dagan sa driver, ang kinaiya ug ang mas dali nga pasilidad sa pagsumbong gamit ang susamang application.
Matud sa gobernador, daghan na siya nga nadawat nga reklamo sa mahal nga tingil sa mga pletehan sa panakyanan, dala na usab sa kakuwang sa mga pangpublikong panakyanan nga nag-alagad sa mga ruta.
Gipadayag ni Ronald Rada ang country director sa Grab, nga gawas sa Grab Car, Grab Food deliveries, aduna na usab silay napasugdan nga Grab Trikes, nga bag-o nga nalusad sa Zamboanga City.
Dinhi, sanglit ang operation sa mga tricycles, ang mga local nga kagamhanan ang nagregulate, matud ni Aumentado nga iyang tigumon si City Mayor Jane Yap, Dauis mayor Romal Bullen ug Panglao Mayor Edgardo Arcay aron makasugod sa tulo ka lugar sa Bohol ang Grab Trikes.
Ug kon kaniadto ang mga trike sa Tagbilaran gidid-an nga makasulod sa Dauis ug Panglao panghatud og pasahero, samtang dili usab makasulod sa Tagbilaran aron mamasahero ang trikes sa Dauis ug Panglao.
Apan sa pagpailawom sa Grab Trikes, magsabut na ang tulo ka mayor sa bukas nga mga utlanan aron makasulod ug gawas ang mga Grab registered trikes, aron may mas mapili na ang nga pasahero nga mas baratong komportable nga panakyanan.
Mao na kini ang daku nga opportunity ilabi na sa mga travellers nga nangreklamo sa mahal nga pletehan nga gipangayo sa mga drivers, ug transport groups, matud pa ni Aumentado.
Gipadayag sa gobernador nga ang kinaiya sa mga driver ug operators nga “one time-big-time,” tinuod moginansya man og daku pero dili na kanunay, samtang ang nga opisyales ang perming hagbongan sa basol.
Pinaagi sa Grab, Nakita na nato nga mikunhod na ang pletehan ilabi na sa Dauis, Panglao ug Tagbilaran, saysay ni Aumentado.
Apan, sumpay sa gobernador, iyang gilantaw ang pag-abiabi na usab sa Grab Trikes.
Sa tinuod lang, makatabang ning Grab Trikes, once nga sila ang mo-apply alang sa Grab Trikes, libre na sila makasulod hatud ug pick up ug pasahero sa Dauis ug Panglao, dayag sa gobernador. (PIABohol)
