MIKABAT sa Php 6,843,023.50 ang kantidad sa giapod-apod ngadto sa mga asosasyon ug kooperatiba, atol sa kasumaran sa adlaw’ng natawhan ni Gobernador Erico Aristotle Aumentado, Disyembre 29, didto sa bag-ong Kapitolyo Dakbayan sa Tagbilaran.
Pinaagi sa pagpahiluna sa Provincial Cooperative Development Office (PCDO) nga gipanguluhan ni Ma. Conrada Fuentes, 20 ka mga kwalipikado nga kapunungan ang nakadawat sa abag alang sa panginabuhian.
Kahinumduman nga ang mga opisyales sa maong mga kapunungan nga nahisgutan, misubmitar og project proposal ngadto sa PCDO, gipresentar nila kini ug gidepensahan aron maaprobahan ang ilang pagpangayo og pondo gikan sa Pangagamhanan para sa ilang napilian nga proyekto.
Ang maong mga kapunungan, mao ang Genomoan Farmers Association, gikan sa Genomoan, Loon, sa proyekto nga Backyard Hog Fattening, Cansague Sur Farmers Association, sa Cansague Sur, San Isidro, Backyard Hog Fattening, Sampoangon Farmers Association, Sampoangon, Calape Tea Production, Nagkahiusang Mag-uuma sa Barangay Canlaas, Canlaas, Antequera, Vermi Composting Facility with Multi-purpose Shredder Machine, Alburquerque Mananggiti Association, Dangay, Antequera, Coconut Wine Production, Maitum Coconut Farmers Association, Maitum, Catigbian, Backyard Goat Raising and Fattening, Baud Women’s Association, Baud, Pres. CPG, Rice and Feeds Supply, Jandayan Island Motor Pumpboat and Fisherfolk Association (JAIMPUMPFA), Jandayan Sur, Getafe, Motor Parts, Manuel Roxas Farmers and Livelihood Association, Manuel Roxas, Trinidad, Acquisition of Farm Machineries, Bongbong Active Farmers Association, Bongbong, Trinidad, Water Refilling Station, Overland Small Farmers Association (OSFA), Overland, Buenavista, Hog Fattening, Purok-5 Farmers Association, Purok-5 Nueva Estrella, Bien Unido, Rental of Farm Machineries, Nagkahiusang Mananagat sa Tugnao(NagMaTu), Tugnao, Pres. Carlos P. Garcia, Fishing Supply, Mabuhay Cabiguhan Palayan Farmers Association, Cabiguhan, Trinidad,Acquisition of Farm Machineries, Nagkahiusang Mag-uuma ug Mananagat sa Aguining (NaMaMasaAg), Aguining, Pres. Carlos P. Garcia, Acquisition of Farm Machineries, Macaban Kakaw-Krayollo and Lubi-Netibo Agriculture Cooperative, Sitio Sun-ok, Sto. Rosario, Inabanga, Solar Power Energy System and Water Pump, Badiang Self-Help Multipurpose Cooperative (BashMuco), Bacong, Anda, Banana Chips Production, Sudlon Universal Agriculture Farmers Association, Sudlon, Alicia, Agrivet Supply, Calatrava Womens Workers Association, Calatrava, Carmen, Cattle Fattening, ug Bugsoc Women Association, Bugsoc, Sierra Bullones, sa proyekto nga Dressmaking.
Si Board Member Lucille Lagunay, nga mitambong sa kalihukan, mipaambit sa iyang personal nga kasinatian bahin sa mga naunang nakadawat og ayuda gikan sa Panudlanang Probinsyal nga nagmalampuson sa ilang proyekto.
Gisuportahan ni Fuentes ang maong testimonyo uban ang pagdasig sa tanan nga magmatinud-anon ug magtinabangay kay ang ilang kalampusan, paglambo sa komunidad.
Samtang sa laing bahin si Congresswoman Van-van Aumentado nga misuporta sa maong kalihukan, mipadangat sa pahalipay ngadto sa tanang kapunungan sa ilang pagkugi aron maaprobahan ang ilang gipangayo nga pondo gikan sa gobyerno para sa ilang proyekto.
Miawhag kini nga ipadayon ang momentum aron magmalampuson ang ilang gidamgo nga kalampusan.
Si Gobernador Aris Aumentado sa iyang bahin, mipasubang og usa ka hagit ngadto sa mga kapunungan nga palambuon ang kantidad nga ilang nadawat aron adunay rason nga dugangan ang sa iyang buhatan ang pondo alang sa ilang proyekto.
Pagdugang ni Aumentado, “Ang ubang mga taw nakaingon nga walay gobyerno nga nagpakabana alang kanila, apan kamo nga misalig sa atong administrasyon, ug kamo nakadawat karon sa ayuda gikan sa Kagamhanang Probinsyal, kamo ang ebidensya nga naay gobyerno nga naglantaw para sa inyong kaayuhan. Anaa ang administrasyon ni Gobernador Aris Aumentado, andam mutagana nga mutabang alang sa inyong paglambo.”
Gihulagway ni Aumentado nga dili perpekto ang iyang liderato, apan sa kanunay nagkugi usab siya aron ihatag sa Katawhang Bol-anon ang de kalidad nga pagserbisyo.
Gitapos ang seremonya sa pagtugyan sa mga ayuda ngadto sa mga benepisyaryo pinaagi sa mga mensahe sa pasalamat sa pipila ka mga presidente sa kapunungan. (RTB)
