TULO ka pamilya gikan sa lungsod sa Alicia, Panglao ug Cortes ang maswerte nga nakadawat sa libreng balay kagahapong adlawa, Enero 2, atol sa gipahigayon nga seremonyas sa pagtugyan, nga gipanguluhan ni Gobernador Erico Aristotle Aumentado ug sa Hepe sa Provincial Community Affairs and Development Unit (PCADU), PLTCOL Norman Nuez.
Ang maong tulo ka balay bunga sa kolaborasyon sa adbokasiya sa magtiayong Aumentado nga Balay sa Paglaum, ug sa programa sa Bohol Police Provincial Office (BPPO) nga Libreng Alagad ug Balay (LAB).
Matud sa Gobernador nga sa tuig 2024, 145 ka benepisyaryo ang ilang naaprobahan nga mahatagan sa 145 ka mga balay, gikan sa ilang personal nga pondo. Ang BPPO mao ang nagdumala sa pagpangtukod sa nahisgutang 145 ka balay.
Pagdugang ni Aumentado ang balay sa Paglaum, nahimugso human ang kanhi Provincial Director PLTCOL Lorenzo A. Batuan nakig-alayon kanila ni Kongresista Van-van Aumentado alang sa pinansyal nga suporta.
Gisugdan ang Balay sa Paglaum sa upat ka balay ug karon, 73 ka balay ang gipondohan pinaagi sa maong adbokasiya. Kini ipanghatag ngadto sa mga Bol-anon nga mas nagkinahanglan diin wala pa makabangon gikan sa mga kalamidad. Paagi kini sa magtiayon, pagpasalamat sa bug-os nga suporta sa katawhang Bol-anon ngadto sa mga Aumentado.
Disyembre 25, isip paghandum sa kasumaran sa kamatayon, sa giila nga Boholano Visionary Leader, Atty. Erico B. Aumentado, nagdugang ang magtiayong Aumentado og 25 ka benepisyaryo sa Balay sa Paglaum.
Disyembre 29, gisaulog sa Gobernador ang iyang ika-47, ug dugang 47 ka benepisyaryo usab ang hatagan og panimalay.
Si Aumentado nagkanayon nga sa tuig 2025, adunay bag-ong mga benepisyaryo nga idugang ang Balay sa Paglaum.
Dili kapugngan ang mga luha sa kalipay sa magtiayong Alfredo ug Rosalinda Gomup-as, lumulupyo sa Purok7, Sitio Calinguhan Barangay Cayacay, Alicia, sa diha nga ilang gidawat ang balay nga gikan kang Aumentado uban sa BPPO.
Ang magtiayon nagkanayon nga 50 ka tuig na sila nga minyo ug wala makatilaw sa maayo nga pamuyo kay ilang giuna ang ilang mga anak ug ang pagserbisyo sa komunidad. Para kanila ang balay nga ilang nadawat, usa ka dili hitupngan nga regalo sa ilang pagsaulog sa ika-51 nga anibersaryo sa ilang kaminyuon karong Enero 13, 2025.
Samtang sa laing bahin ang magtiayon nga si Jonathan Totu ug Margarita Fudalan, lumulupyo sa P1 Brgy. Tangnan, Panglao, mao ang napili nga benepisyaryo sa Balay sa Paglaum sa lungsod sa Panglao
Gipadayag sa Gobernador ang pagpasalamat, ngadto sa konseho sa barangay nga gipanguluhan ni Kapitana Basilides Balo ug sa Panglao Police Station pinaagi ni PLT Francis Bangcasan Briones, Deputy Chief of Police, sa pagpahiluna sa malampusong pagtukod sa maong balay.
Mipahibalo ang Gobernador nga adunay usa ka milyon (P1,000,000) nga kantidad sa proyekto nga ihatag gikan sa buhatan sa Gobernador ngadto sa Barangay Tangnan, kung nakompleto sa barangay ang mga rekisito niini.
Katapusang benepisyaryo nianang adlawa, mao ang magtiayon nga sila si Mr. and Mrs. Robert Balbuena sa Munserrat, Cortes.
Subay sa rekomendsyon sa Kapulisan, kwalipikado nga benepisyaryo ang pamilya Balbuena, gumikan sa anak niini nga Person With Disability (PWD).
Si Aumentado nagkanayon, nga ang programa sa BPPO ug Balay sa Paglaum, gitumong aron mapakusgan ang mga inisyatibo kontra insurhensiya. Pagtabang usab kini ngadto sa anaa mas ubos nga hut-ong sa katilingban.
Si Aumentado mipasabot nga buot ipadangat sa Kagamhanang Probinsyal ngadto sa mga sektor nga nawad-an og pagsalig sa Gobyerno ang mensahe, nga bisan dili perpekto ang Pangagamhanan, apan ubos sa iyang liderato, andam kini sa pagsuporta sa tanan nga muduol ug musalig ngadto sa iyang administrasyon, pagbaton sa kabag-uhan.
Baruganan ni Aumentado, kung magkahiusa ang katawhan pagbaton sa kausaban, ngadto sa usa ka malambuon ug Limpyong Gobyerno, mas epektibo ang pagkab-ot niini pinaagi sa paghiusa ug pagtinabangay. (RTB)
