TAGBILARAN CITY, Bohol (PIA)—Daku ang kalipay ug gibati nga kalampusan ni Gobernador Ercio Aristotle Aumentado sa pagsulod sa Grab dinhi sa Bohol kay siya na lang matud pa niya ang permi’ng gisaway sa mga katawhan nga diskompyado sa matang sa serbisyo sa panakyanan dinhi sa Bohol.
Ang gobernador, kinsa miangkon nga tuyo ug tumong lamang niya nga may mosulod nga mas daghang mamumuhunan dinhi aron may mapasugdan nga mga kapanarbaho-an, mibutyag nga niadtong Marso niining tuiga, pinaagi sa pagpanguna sa Bohol Chamber of Commerce and Industry, napadayag usab ang laraw sa Grab.
“Mapasalamaton kita nga nahitabo na kini sa mas sayo nga panahon, kay daghan na nga mga namakayay ang nagreklamo ngadto sa gobernador sa kamahal sa paningil sa mga grupo nga nagtanyag sa serbisyo sa panakyanan,” dayag sa gobernador.
Pipila kanila ang nag One-Time, Big-Time aron makaginansya og daku sa usa ka adlaw, apan, kita permi ang alkansi, saysay sa gobernador kinsa nangita og solusyon alang niini aron matanyagan og paglaum ang mga Bol-anon.
Mao na kini ang Grab, dugang ni Aumentado.
Ang Grab, usa ka digital platform nga nagtanyag sa mga silusyon sa mga panginahanglan sa usa ka lugar mga maghimog modernisasyon, may GrabCar ug Grab Food nga opisyal na nga gilusad dinhi sa Bohol didto sa Hennan Resort sa Panglao, Disyembre 16.
Pinaagi sa GrabCar, mahimo na nga ang mga pasahero, mao nay magbook alang sa ilang on-demand transport nga nagtanyag sa sayon aboton ug luwas nga mga panakyanan, ug bisan pa kon bag-o pa dinhi sa Bohol, among panindoton pa kini nga serbisyo, pasalig ni CJ Lacsican, Vice President for Cities and Business Operations sa Grab.
Kita nga mo-abut sa tulo ka pilo sa minimum nga suholan, kini maoy gipasalig ni Lacsican ngadto sa mga pribadong mga tag-iyahan og sakyanan nga ilang i-linya alang sa Grab.
Mga bag-o nga sakyanan gikan sa 2022 ngadto sa labing bag-o ang pwede nga gamiton, mismo ang tag-iya ang momaneho ug magdepende sa iyang oras nga available, kay ang kompanya, motabang aron marehistro kini gikan sa pribadong sakyanan ngadto na sa pangpubliko subay sa lagda alang sa Transport Network Vehicle Service (TNVS).
Alang kang Aumentado, gawas nga pinaagi sa Grab, napa-ubos na ang pletehan sa Tagbilaran ngadto sa Panglao Airport nga kanhiay, anaa sa P400-500, karon ubos na sa katunga, subay sa gisaysay sa Grab official nga si Jay Lim, hepe sa Grab Central Visayas, kin nakahatag na usab og panginabuhian sa karon, 40 ka mga grab car drivers nga nagsugod sa serbisyo dinhi sa Bohol.
Agi og dugang pa niini, matud sa gobernador nga iyang tigumon sila City Mayor Jane Yap, Dauis Mayor Roman Bullen ug Panglao Mayor Edgardo Arcay aron sabutan ang pagpasulod na usab sa GrabTrike, serbisyo nga magtugot na sa mga trikes nga rehistrado sa Grab nga mopickup ug mohatud sa mga pasahero bisan gawas sa ilang rgulasyon segun sa gitugot sa mga local nga Sanggunian.
Si Aumentado mipasalig, nga ang Bohol andam nga mosuporta sa mga pamuhunan sama sa Grab, nga makaayo sa mga Bol-anon. (RAHC/PIA-7/Bohol)
