PAGPAAMBIT sa kamaya ngadto sa pamilya ug sa ubang mga tawo nga dala sa pagkatawo ni Kristo, maoy laing mensahe ni Gobernador Aris Aumentado sa pagsaulog sa Pasko karong tuiga dungan sa gihimomng Christmas party sa mga sakop sa Bohol Media dili palang dugay sa Dao Diamond Hotel ning syudad sa Tagbilaran.
Matod ni Aumentado kinsa gihulagway nga usa ka relihiyuso, nga kini nga kamaya mao usab ang gibati sa mga magbalantay sa mga karnero dihang gipahibawo sa mga anghel sa pagkatawo ni Hesukristo.
Namahayag ang amahan sa lalawigan nga sama sa mga magbalantay sa karnero, angay usab ipaambit ngadto sa uban ang kamaya sa Pasko labi na niadtong gisalikway sa kahakog ug kadawo.
Iyang gikutlo ang mga pulong sa miresign nga si Pope emeritus Benedict XVI nga nagpahinumdom sa katawhan unsaon pagpaambit sa kamaya ngadto sa uban.
“Joy is the true gift of Christmas, not the expensive gifts that call for time and money,” pamulong ni Aumentado nga kinutlo niya sa kanhi Santo Papa.
Gipasabot ni Aumentado nga mabuhat ang pagpaambit sa kamaya niining panahuna pinaagi sa pagpahiyom, simple nga buhat, gamay nga tabang ug pagpasaylo ug kon kini buhaton, matod ni Aumentado mabalik ang kalipay nga gihatag ngadto sa uban.
Si Aumentado namahayag nga dunay kamaya sa Pasko tungod kay si Hesus nga natawo, naghatag og kabuhong sa kinabuhi sa tanang tawo.
Samtang sa susamang kalambuan, ang labing una nga babayeng-kongresista sa Segundo distrito ug asawa sa gobernador Vanessa Cadorna Aumentado namahayag nga pinaagi sa pagsaulog sa Pasko uban sa pamilya ug mga minahal sa kinabuhi, maukit sa kasingkasing sa mga tawo ang tinuod nga kamaya nga si Hesukristo lamang ang makahatag.
Nidasig usab si CongW. Aumentado sa katawhang Bol-anon nga sa pagsaulog sa Pasko karong Disyembre 25, kalimtan ang mga nanglabay nga dili maayo ug nanghinaot nga magmalipayon ug magkahiusa ang tanan ning mao nga kasaulogan.
“Magpasalamat kita sa Ginoo sa tanang grasya nga atong nadawat karong tuiga 2024…ug I wish everyone a prosperous wonderful year 2025,” dugang ni Kongresista Vanvan Aumentado. (RTB)
