TAGBILARAN CITY, Bohol, Dec 9 (PIA)—Gikan sa 2.9 porsyento nga namatikdang paglihok sa presyo sa mga nag-unang paliton nga gimonitor sa Philippine Statistics Authority (PSA) niadtong Oktubre, mingkalma ang pagsibog sa presyo sa buwan sa Nobyembre, ngadto na sa 1.8 porsyento, dinhi sa Bohol.
Kini nga kaugmaran, gikalipay ni Gobernador Erico Aristotle Aumentado, kay kini magtabang sa mga kabus sa Bohol sa pagcope-up sa ilang mga galastohon sa igo-igo ra ang kita.
Kini usab samtang gihangyo na sa gobernador ngadto sa mga nasudnong kagamhanan nga may mga nahibilin pang mga proyekto ug programa sa pagpakunhod ug papapas sa kawad-on, ang adto na ibubo ang mga nahibiling pundo sa mga kalungsuran sa Bohol nga natumbok nga nagkinahanglan pang tabangan.
Segun pa sa PSA, aduna pay 264,480 ka mga Bol-anon nga giisip nga kabus kay ang ilang mga kita sa pagpanarbaho, igo lamang nga makasapal sa binuwan nilang panginahanglan sa pagkaon, subay sa labing bag-ong survey.
Ang Consumer Price Index (CPI) nga gimonitor sa PSA nagpakita nga niining milabay nga busan sa Nobyembre, ang 1.8 porsyento nga nasumada, maoy resulta sa kinatibuk-an nga sibog sa mga presyo sa duha ka buwan nga gitandi, mas nailhan nga bili sa inflation.
Kon itandi usab sa nasudnong ug rehiyonal nga dagan sa presyo, ang Inflation Rate (IR) sa Bohol nga anaa sa 1.8 porsyento, mas ubos pa sa nasudnong IR nga anaa sa 2.5 porsyento og 0.7 porsyento, ug mas ubos pa usab og 0.5 porsyento sa Central Visayas nga karn mingtala sa 2.3 porsyento.
Segun pa ni Jessamyne Anne Alcazaren, Provincial Statistician, ang pagkubos sa kita sa presyo sa Bohol sa buwan sa Nobyembre, dala sa mas hinay nga kamang sa mga pagkaon ug ilimnon nga dili makahubog nga dihay namatikdang 3.9 porsyento nga pagsaka sa Noyembre gikan sa 6.6 porsyento nga paggimok niadtong Oktubre.
Nakatabang usab ang pabalay, tubig, elektrisidad, gas ug uban pang sugnod nga sa tibuok tuig mingtala og -0.6 porsyento gikan sa 0.0 porsyento sa miaging buwan, matud ni Alcazaren.
Ikatulong nakatampo sa pagkalma sa lihok sa presyo mao ang hinay usab nga ki-at sa mga kan-anan, ug mga balay katulganan nga mingtala og 0.3 porsyento kon itandi sa 1.9 porsyento sa Oktubre, saysay ni Alcazaren. (rahc/PIAbohol)
