TULO ka mga sakop sa big-time Mindanao-based robbery gang ang nasikop karong bag-o sa mga operatiba sa Philippine National Police (PNP) sa dakbayan, human sa pagpanulis sa national highway sa barangay Tiptip, ning dakbayan.
Si PLtCol. John Escober, hepe sa kapolisan sa dakbayan, niingon nga niadtong Biyernes niabot sa dakbayan ang gang aron sa pagpanulis samtang ang mga suspek nag-atubang og mga kaso sa frustrated murder sa Mindanao. Gani, nagduda siya nga ang duha nagdoble isip gun-for-hire inig-abot nila sa dapit.
Giila ang mga suspetsado nga sila si Jeffrey N. Gamil, 36, residente sa barangay Bigong, Tigbao, Zamboanga del Norte; Jackson A. Corpuz, 39, ug ilang kauban nga babaye nga si Margie L. Aguala, 42, pulos residente sa barangay Dos, Buenavista, Agusan del Norte.
Na-corner sila sulod sa Room 202 sa Genesca Haven Apartelle sa Poblacion Dos, ning dakbayan atol sa hot pursuit operation.
Nasikop ang tulo human gisusi dayon sa mga operatiba ang centralized, moderno nga CCTV camera sa kagamhanan sa dakbayan nga nagpakita sa duha ka armadong suspek nga nagdali sa usa ka apartelle nga ilang gigamit isip temporaryong kapuy-an.
Gitulis sa mga suspek ang usa ka Victoria T. Rucas, 65, residente sa Purok 1, barangay Tiptip, ning dakbayan, og P18,000 nga cash human napalitan sa usa ka sari-sari store sa may national highway.
Si Escober nitug-an nga ang pag-abot sa gang sa siyudad nagdala og dakong plano sa pagpahigayon og sunod-sunod nga pagpanulis sa siyudad ingon man sa kasikbit nga mga lungsod.
Ang imbestigasyon sa kapolisan nagpakita nga ang grupo mohimo og mga scam ug swindling operation tungod kay nasakmit sa ilang posesyon ang gatusang peke nga P1,000 nga papel-de-bangko.
Nakuha gikan sa mga suspek ang usa ka Cal. 45 nga pistola nga walay serial number nga adunay usa ka magazine ug walo ka buhing bala; Cal. 9mm pistol nga adunay serial no. F43077 ug magazine nga adunay lima ka buhing bala ug ang duha ka armas walay lisensya, matod sa kapulisan.
Nasakmit usab gikan sa mga suspek ang usa ka Oppo Cellphone, peke nga kwarta nga nagkantidad og P159,000, genuine cash nga P13,730, lakip ang duha ka kutsilyo, sling bag, color maroon sling bags, ug pitaka.
Ang ilang get-away nga motorsiklo (1501-279092) gi-impound human sa ilang pagkasikop kagahapon.
Ang tulo gitanggong sa custodial room sa City PNP headquarters ug kasong robbery ug kalapasan sa R.A. 10591 kon illegal possession of firearms ang napasaka na sa kapulisan.
Ang mga operatiba sa kapolisan sa dakbayan nagkanayon nga ang episyente nga mga CCTV camera sa highway nga gi-upgrade ni City Mayor Jane Yap maoy hinungdan sa dinaliang pagkasikop sa mga sakop sa robbery gang kansang ruta sa pag-ikyas nakita sa CCTV.
Gikutlo usab ni Police Chief Escober ang iyang mga tawo, nga nagtrabaho ubos sa P/Lt. Adriel John Francisco alang sa malampusong hot pursuit operation pagsikop sa mga suspek. (RTB)
