GIPANGUNAHAN ang maong kalihukan nila ni Police Provincial Director Col. Lorenzo Batuan ug bol-anong Department of Education Undersecretary Trygve Olaivar nga maoy nirepresentar ni kanhi Senador ug karon Education Secretary Sonny Angara diin gi-inagurahan usab ang upat ka andanang PNP Building ug duha ka andanang officers quarter sa Camp Francisco Dagohoy, dakbayan sa Tagbilaran.
Ang multi-million nga balor sa bag-ong building sa Bohol Police Provincial Office hingpit na nga naturn-over ug gisubhan niadtong Septyembre 1, 2024.
Ang dako nga BPPO building nga mobalor og P50 million ug ang officers quarter nga nagkantidad og P20 million parehong gipondohan ni Angara diin ang Department of Public Works and Highways -first district engineering office ang nagpatuman sa proyekto.
Mitambong sa kalihokan si Gobernador Aris Aumentado nga mipahalipay sa Bohol PNP. Kauban niya sila si Mayor Jane Yap, pipila ka mga mayor ug mga chief of police.
Sa pahayag ni Olaivar, siya miingon nga ang maong proyekto dili lamang bahin og pagtukod og bag-ong pasilidad kondili nagsimbolo kini sa ilang dedikasyon sa pagsuporta ngadto sa kapolisan nga nagserbisyo ug nagsakripisyo alang sa kaluwasan ug seguridad sa katawhan.
Gawas sa bag-ong PNP Building, si Olaivar nagkanayon nga giprayoridad usab nila ang pagtukod og bag-ong barracks o officers quarter aron maseguro nga dili na matuan og uwan ang mga opisyal.
Ang DepEd Usec mingon nga espesyal gyud sa iyang kasingkasing ang mga pulis sanglit ang iyang amahan kaniadto pulis man sab.
Gidayeg usab ni Olaivar ang kapolisan sa walay undang nga pagbantay aron lamang maseguro nga luwas ang katawhan.
Giila usab sa undersecretary ang kapolisan nga nisakripisyo sa ilang kaugalingon panahon sa pandemya ug pagtuman sa ilang katungdanan isip tigpatuman sa balaod.
Kinasingkasing nga gipasalamatan ni Olaivar ang kapolisan sa Bohol sa ilang walay puas nga paningkamot sa pagpatunhay sa kalinaw ug kahapsay sa probinsiya.
Dungan sa gihimong inagurasyon, gibendisyonan usab ang upat ka brand new nga Isuzu pick-up police patrol 4×4 alang sa provincial headquarter ug sa mga lungsod sa Sevilla, Mabini ug Guindulman. Dako kinig tabang aron mapauswag pag-ayo ang lihok ug ka-epektibo sa kapolisan.
Kahinumduman nga subay sa strategic change agenda sa administrasyong Aumentado kanunay gitinguha niini ang kahapsay ug kalinaw sa lalawigan sa Bohol uban sa pakig alayon sa BPPO. Ang bag-ong building ug mga patrol car nga nadawat sa Bohol police dakog tabang alang sa pag-maintain sa peace and order sa lalawigan sa Bohol labi sa pagkakaron ikaduha ang Bohol sa safest province sa Pilipinas. (RTB)
