TAGBILARAN CITY, Bohol (PIA)—Gipagawas sa Provincial Peace and Order Council (PPOC), niadtong bag-ong nilabay nga hiniusang tigum sa Provincial Anti Drug Abuse Council (PADAC) ang usa ka resolusyon nga magtugot sa gobernador nga gamiton na ang P6M nga supplemental budget alang sa confidential funds sa konseho.
Kahinumduman nga ang Sangguniang Panlalawigan, bag-o lamang mi-aprobar sa supplemental budget No. 3 nga nagtangag sa P6 Milyones nga dugang pundo aron magamit sa gobernador, kinsa maoy tsirman sa PPOC, aron kapundohan usab ang mga programa ug proyekto alang sa pagpatunhay sa kahapsay ug kalinaw sa Bohol.
Si Gob Aumentado usab, mipakita sa mga sakop sa PPOC nga bukas kini nga minghatag sa mga pahalipay sa mga sakop sa kapulisan ug kasundalohan sa mga kalampusan niini sa kampanya subay sa pagpatunhay sa kalinaw sa Bohol.
“Makita nato ang lig-on nga suporta nga gihatag sa gobernador ug tsirman sa PPOC ngadto sa mga tigpatuman sa balaod, mao nga taas ang morale sa mga tawo ug mas ganado kini nga magdupot sa ilang trabaho,” matud ni Police Senior Superintendent Lorenzo Batuan, hepe sa kapolisan sa Bohol.
Gibutyag usab ni Police Community Affairs and Development Unit chief, PSupt Norman Nuez nga daghan nga mga kalampusan sa kapolisan ug nga ahente sa kagamhanan, nahimo tungod sa pag-atiman sa mga intelligence networks, nga gipasidunggan usab sa ilang mga positibong tabang sa kampanya.
Ang pundo usab, nga dili na kinahanglan pa nga ipailawom sa makuti nga audit subay sa mga balaod sa Commission on Audit, gamiton aron dugang pundohan ang mga poverty alleviation programs nga pasugdan sa kagamhanang probinsyal ngadto sa 20 ka mga kalungsuran nga unang natumbok sa Philippine Statistics Authority (PSA) nga labing kabus.
Gani sa bag-ong State of the Province, gipun-an sa gobernador og lain nga upat pa ka lungsod ang bubuan sa pundo sa mga ahensya nga nakig-kuyog sa kapitolyo alang s amga programa sa kawad-on.
Ang pagpundo alang sa mga programa sa pagpakunhod sa kawad-on, mao usab ang taktika nga gigamit sa amahan sa gobernador, diha nga aktibo niining gipangunahan ang kampanya batok sa insurhensya sa Bohol.
Ang pagpa pundo sa mga poverty alleviation programs ug pagpasugod sa mga kapanginabuhian sa mga kalungsuran diin nahugpong ang mga katawhan nga batokan ang komunismo, maoy gitumbok nga usa sa mga labing malampuson nga programa sa LGUS dinhi sa Pilipinas.
Gani, sa kasaysayan sa armadong kusog sa nasud, ilado na ang Bohol Experience isip maoy sinugdanan sa whole of nation approach nga maoy gisagop sa nasudnong kagamhanan karon sa mga proyekto niini alang sa kalinaw. (PIABohol)
