GILUSAD na didto sa Holy Spirit School AV Hall ang END Vote Buying Movement kon diin ang pinasiduganggang mamumulong mao si Baguio City Mayor Benjie Magalong.
Si Magalong apil sa grupo sa mga mayor sa tibuok nasud nga gitawag og Mayors 4 Good Governance. Pipila nga apil sa ilang grupo mao sila Marikina City Mayor Marcelino Teodoro, Pasig City Mayor Vico Sotto ug Jagna Mayor Joseph Rañola.
Ang lead convenor sa EVBM mao si Lily Flordelis samtang co-convenors sila retired General Edgardo Ingking ug Fr. Jingboy Saco.
Sa iyang powerpoint presentation, gisaysay ni Mayor Magalong ang mga tinubdan sa mga pangwarta sa pulitiko ug unsa ang epekto niini sa paghatud sa mga ‘basic services’ ngadto sa katawhan.
Iya usab gihulagway kon nganong sayon sayon nga makapamalit og boto ang kasagarang mga politiko nga sayud man ang kadaghanan nga ‘unlawful’.
Si Jagna Mayor Joseph Rañola kinsa maoy usa sa mga budget consultant ni Mayor Magalong nag-giya kaniya sa mga pasikot sikot sa nasudnong budget.
“Your choice can either make or unmake you. Make a good choice”, pamahayag pa sa mayor sa Dakbayan sa Baguio.
Gihimong tagline niya ang “Good Governance, Beyond Politics” ug karon nahimo nang “Good Governance, GET INVOLVED.”
Kini isip pag-awhag sa mga nagkadaiyang sektor nga manginlabot sa katilingban kon diin ilang gisaysay nga ang media dako ang mahimong impluwensya niini.(Kahlil Lester O. Camba)
