GIKLARO ni ‘Tigpanalipod’ Atty. Jordan M. Pizarras nga dili duwa duwa ang mahimong magbabalaud sanglit daghang pagtuon ug pag tuki-tuki ang gikinahanglan.
“Ang paghimo og mga balaod usa ka komplikadong proseso nga kasagarang naglambigit og legal nga kahanas ug maayong pagsabot sa gehisgutan nga mga butang”, pamahayag pa ni Atty. Pizarras.
Iyang gitagsa-tagsa ang mga lakang alang sa pagpanday og balaud.
Una, ang pag-ila o pagsuta kon unsay panginahanglanon. Ikaduha na ang panuki-duki o research nga sundan sa paghimo og outline.
Ikaupat na ang pagsuwat mismo sa balaud ug ikalima ang pag-review niini lakip na ang paghimo sa mga kabag-ohan.
Sa unang lakang, gikinahanglang sabton ang issue nga angay sulbaron apil na niini ang pagsaysay sa tumong nga gusto makab-ot.
Kon manukiduki na ug maghimo sa mga konsultasyon, iladlad una ang mga balaud, regulasyon o ‘best practices’ nga may kalabotan sa maong issue. Labing maayo nga makonsulta ang mga eksperto, apektadong grupo ug mga ‘stakeholders’.
Sa maong pamaagi, makakuha kita og saktong ‘input’ ug ‘feedback’ .
Kon maghimo na og outline sa balaud, ang pagka-detalyado, mekanismo sa pagpahigayon ug uban pa ang angay timan-an. Kon pandayun na ang maong balaudnon, angay sigurohon nga ang balaud nahiuyon sa gitawag nga ‘legal framework’.
Sa katapusang pamaagi, angay balik-balikon basa ang balaudnon arun masuta kon dunay mga panagsumpaki o ‘inconsistencies, usbon ang maong draft ug himoon ang mga ‘necessary corrections’.
“Seryoso nga trabaho nga pagama o pagpanday ug balaod. Kinahanglan ug daghang kahibaw labi na kabahin sa mga legal nga butang”, dugang pa ni ‘Tigpanalipod’ (Kahlil Lester O. Camba)
