SI Provincial Board (PB) Member Tita Baja maoy mipuli isip acting governor sa Bohol nunot sa kamatayon ni Acting Governor Victor Dionisio Balite niadtong Hulyo 17, 2024.
Si Balite nagserbisyo isip acting governor sukad niadtong Mayo sa dihang gipaubos sa preventive suspension si Gobernador Aris Aumentado taliwala sa imbestigasyon sa Office of the Ombudsman sa pagtukod ug operasyon sa kontrobersyal nga Captain’s Peak Resort sa Sagbayan.
Matod ni Department of Interior and Local Government (DILG) Provincial Director Jerome Gonzales nga si Baja maoy labing taas nga opisyal sa kagamhanang probinsiyal sunod kang Balite.
Si Baja ang nakakuha sa pinakadaghang boto sa mga sakop sa Sangguniang Panlalawigan sa 2022 elections nga naghimo kaniya nga senior PB member.
Human sa unom ka buwan nga pagkasuspenso ni Aumentado, si Baja magsilbi nga bise gobernador sa kinatibuk-an sa unang termino ni Balite nga mapupos sa Hunyo 30, 2025.
“Tungod kay dunay permanenteng bakante sa opisina sa bise gobernador, automatic na nga mo assume ang highest-ranking Sanggunian Panlalawigan member,” matod ni Gonzales
Sa laing bahin, ang ikaduhang labing taas nga ranggo nga miyembro sa PB base sa mga boto nga nakuha sa miaging mga piniliay mao ang linya nga mopuli isip acting vice governor.
Base sa datos sa Commission on Elections (Comelec), si PB Member Benjie Arcamo nakadawat ug pinakataas nga ihap sa mga boto sa 2022 nga eleksyon
Hinuon, ang pag-asumir ni Arcamo isip bise gobernador magkinahanglan og designasyon ni Department of Interior and Local Government Sec. Benjamin Abalos, Jr. (RTB)
AG BALITE, MITALIWAN
Gikompirmar ni Gobernador Erico Aristotle Aumentado nga mitaliwan na ang acting governor sa Bohol nga si VG Dionisio Victor Balite niadtong Miyerkules sa gabii, Hulyo 17, 2024.
Matud pa ni Aumentado nga nitaliwan na ang iyang suod nga higala, elected vice governor sa Bohol ug iyang running mate.
Ang governor mipaambit sa iyang gibati may kalabutan sa kamatayon sa iyang kaabag sa politika.
Dugang pa ni Aumentado, makaguol man ang pagtaliwan sa iyang higala ug partner sa politika pero ang kinabuhi sa tawo lumalabay lang ning kalibutan.
Ang governor nipadayag nga iyang himoon nga inspiration sa padayon nga pagpangalagad sa mga bol-anon ang ilang tandem ni Balite.
Gipadangat usab ni Aumentado ang iyang pahasubo ngadto sa nagbangotan nga pamilya ni Balite.
Ang acting governor anak ni kanhi vice governor Atty. Dionisio ‘Dioning’ Balite.
Ang haya sa acting governor anaa gipahimutang sa may BIT-IC Dao Chapel, Dao Campus, Dao Tagbilaran City, Bohol, diin ang pamilya wala pa mutakda kon kanus-a kini ilubong.
Sa nasayran si Balite nahimong acting governor sukad niadtong buwan sa Mayo ning tuiga dihang gipaubos sa preventive suspension sa Office of the Ombudsman si governor Aumentado subay sa imbestigasyon sa pagtukod sa kontrobersyal nga Captain’s Peak Resort sa lungsod sa Sagbayan. (RTB)
