SA KATAPUSAN gilansangan na sa Korte Suprema ang lungon alang sa Panglao Reclamation Project human gi-deny niini ang Petition for Review sa Oasis Leisure Islands Development sa kaso niini batok sa Provincial Government of Bohol (PGBh), ni kanhi Gobernador Edgar Chatto ug sa Sangguniang Panlalawigan (SP).
Ang labaw nga hukmanan sa nasod misalikway sa ‘petition for review in certiorari’ sa desisyon ug resolusyon sa Court of Appeals niadtong Oktubre 26, 2021 ug Pebrero 15, 2023.
Ang Court of Appeals (CA) sa usa ka 26-panid nga desisyon, mibasura sa apela nga gisang-at sa Oasis aron pugson ang PGBh sa pagtuman sa Joint Venture Development Agreement (JDVA) nga gipirmahan sa Oasis ug kanhi Gov. Chatto, 11 ka adlaw sa wala pa ang pagtapos ni Chatto isip gobernador sa Bohol, alang sa reclamation sa labing menos 450 ka ektarya sa Panglao Bay aron himuong kalingawan ug resort.
Ang Korte mihukom nga ang JVDA walay kapuslanan gikan sa sinugdanan tungod sa wala pagsunod sa mga substantibo nga kinahanglanon sa balaod.
Nasuta usab sa CA nga ang JVDA gisulod nga walay pagtugot gikan sa Sangguniang Panlalawigan nga nakalapas sa mga rekisitos sa Local Government Code of 1991.
Ang kinahanglanon sa una nga pagtugot gikan sa hingtungdang Sanggunian usa ka sukod sa check and balance. Gidugang kini aron mapaubos ang awtoridad sa kasabutan sa Local Chief Executive, sumala sa Local Government Code.
Dugang pa, walay public bidding nga gipahigayon alang sa JVDA, nga gikinahanglan alang sa reclamation contracts.
Kahinumduman nga gipasaka sa Oasis ang kaso alang sa PGBh sa paghimo sa reclamation contract.
Apan, ang PGBh uban ni Chatto isip gobernador niadto nitubag nga dili kini makahatag ug tukmang panahon sa hangyo sa Oasis tungod kay ang JVDA legal nga depektoso ug morally ug socially questionable base sa pagrepaso sa gisugyot nga proyekto sa SP.
Sa maisugon nga paggamit sa political will nga kanselahon ug i-withdraw ang aplikasyon alang sa reclamation aron mapanalipdan ang interes sa publiko, ang PGBH mitumbok usab nga ang proyekto naghatag ug tin-aw ug presente nga kapeligrohan sa himsog nga biodiversity ug sensitibo nga marine environment sulod sa offshore area sa Panglao Bay, nga gipakita sa SP Committee on Natural Resources ug Environmental Protection ug Turismo sa ilang Committee Report No. 2011-03. (RTB)
