TAGBILARAN CITY, Bohol, May 20 (PIA)—Milampus na usab ang Department of Agrarian Reform (DAR) sa Bohol sa pagtugyan sa kinatibuk-ang 414 ka mga titulo sa yuta: regular man nga Certificates of Land Ownership Awards (CLOA) o electronic-titles (e-titles) sa kinatibuk-an nga 252 kapin ka ektaryas nga mga basakan ug kalubihan ngadto sa 317 ka mga agrarian reform beneficiaries, human sa pila ka tuig usab nila nga hinuwat.
Kini usab human kadaghanan sa mga nakadawat sa mga titulo, nasukip na niadto sa una nga mga communal titles nga gipanghatag sa goberno, apan daghang mga mag-uuma ang nangaluyo dala sa wala silay kasegurohan sa yuta nga ilang gitikad kay ang kapunungan man nakapangalan ang mother title.
Aron maaghat ang mga mag-uuma nga magkugi, gipahiluna sa DAR ang Support for Parcelization of Land for Individual Titles (SPLIT) project aron gihan sa mga mother titles, masipak na ang mga tagsatagsa ka mga titulo sa mga mag-uuma, aron matino na ang mga utlanan sa ilang mga yuta nga matikad.
Sa kinatibuk-an nga 252 ektaryas nga may mga individual titles na, 83 ka ektarya niini napagawasan na og electronic titles samtang ang 168 ka ektaryas, regular nga titulo ang natunol.
Si Primiivo Dusaban, 61 anyos, taga Camalian, Ubay ug nagsunod lamang sa iyang amahan sa pag-tikad sa yuta nga gipanag-iya sa ilang amo nga taga Sugbo, hangtud nga naminyo.
Sakop sa Board of Trustees sa Bayongan EndPoint Irrigation Association nga may kapin kon kulang 300 ka sakop nga mag-uuma, si Dusaban nakadawat og kinatibuk-ang siyam ka ektarya nga yuta nga maiya na.
Daku ang iyang pasalamat, ilabi na usab sa iyang mga sakop nga pursigido nga magpabilin nga manguma, bisan pa sa haylo sa mas sayon nga pangwarta.
Matud niya, ang suporta sa goberno sa mga mag-uuma, daku na kaayo karon, nga mahimo na nga kasaligan nga panginabuhian ang pagpanghumayan.
Didto sa dinungan nga pagtugyan sa mga titulo sa Central Visayas nga gitambongan mismo ni Presidente Ferdinand Bongbong Marcos, ug ki DAR Secretary Conrado Estrella III, gitugyan usab sa Bohol ang kinatibuk-ang mga titulo sa mga mag-uuma nga natigum sulod sa Bohol Cultural Center.
Si Gob Erico Aristotle Aumentado nga mitambong sa pagtugyan, nagapaabut sa iyang pagtimbaya sa mga mag-uuma nga dugay rang gapa-abut nga makuha na nag ilang mga titulo gikan sa kagamhanan, ug kini iyang giisip nga importante nga milestone sa Bohol. (PIABohol)
MAS MAKAENGANYO. Sa unsa, dihang walay tataw nga sukod ug mga utlanan kon hain gayud ang ilang gipangtikad ang ilaha, daghang mag-uuma nga nawad-an og gana sa mother CLOA. Karon nga nasipak na ang CLOA ngadto sa tagsatagsa na ka tawo, gipaabut nga mas momaayo ang produksyon samtang naglaum si Gob Aumentado nga makaabag nag balik angmga mag-uuma sa damgo sa Bohol isip smart, resilient ug inclusive nga ekonomikanhong pag-ugmad sa tanan. (PIABohl)
