TAGBILARAN CITY, Bohol (PIA)—Napamatud-an sa Sangguniang Panlalawigan Committee on Natural Resources and Environmental Protection nga ang kalihukan sa whale-watching sa Alburquerque, naa sa sulod sa usa ka protected area (PA) ug mismo ang inter-action sa mga turista ug sa butanding, nasulod pa usab sa usa ka local nga ordinansa nga gidili ang pagpasulod og tawo.
Kini duha sa mga napalutaw nga kasayuran human ang komitiba nga gipangulohan ni Board Member Jiselle Rae Villamor, mihimo og linawas nga pakisusi didto sa lugar mismo human minghangyo og katin-awan ang mga katawhan sa nahisgutang lugar kabahin sa VicTour’s Recreational Hub sa Santa Fe Beach, Barangay Santa Filomena, Alburquerque, Bohol, nakit-an nga dili lamang sulod sa Alburquerque-Loay-Loboc Protected Landscapes and Seascapes ang operasyon sa negosyo, apan mismo mahitabo sulod usab sa Marine Protected Area o sangktwaryo subay sa Municipal Ordinance No. 08 series 2003.
Gialagar sa mga tag-iya sa whalewatching nga sanglit ang kalihukan nga gipatan-aw, didto na man gawas Alburquerque-Loay-Loboc Protected Landscapes and Seascapes, wala na kini suliran pa ug wala na manginahangan og pagtugot sa Protected Area Management Board (PAMB), Environmental Compliance Certificate (ECC) ug Special-use Agreements in Protected Areas (SAPA).
Apan, bisan pa nga anaa na sa gawas sa protected area and operasyon, ang mga bangka, ang kaligo-an, ang dawatana sa bisita ug administrative offices anaa pa sa area.
Dugang pa, bisan kon may laraw ang LGU Alburquerque nga usabon niini ang ordinansa sa sangktwaryo aron katugutan ang kalihukan sulod sa marine protected area, hangtud nga kini maaprobahan, kinahanglan pa gihapon ang sundon ang karaang ordinansa.
Namatikdan usab sa bahan nga naghimo sa imbestigasyon nga adunay nahitabo nga pagpakaon sa mga butanding o Tukituki, nga nakasupak sa Provincial Ordinance No. 2020-008 “nga naglagda sa mga regulasyon sa paghimo sa Sustainable Marine Wildlife Tourism Interaction sa Bohol,” ug sa the DOT-DA-DILG-DENR Joint Memorandum Circular No. 1 series 2020 kabahin sa mga regulasyon sa pagdumala sa Marine Wildlife Tourism Interactions dinhi sa Pilipinas.
Nakit-an usab sa komitiba sa ilang gihimong inspeksyon didto sa Santa Fe, Alburquerque nga ang LGU Alburquerque nagpadagan usab sa Ecotourism Complex dinha sa Sta. Fe Beach, sulod sa Alburquerque-Loay-Loboc Protected Landscapes and Seascapes, ug bisan pa kon may nakuha kini nga endorsement gikan sa PAMB pinaagi sa Resolution No. 19 series 2022, gimanduan gihapon sila nga pasirad-an human sa Notice of Violation and Temporary Closure Order niadtong Abril 8, 2024 sa rason nga wala kini nakuha nga ECC ug SAPA. (PIABohol)
