GIPAHIGAYON ang usa ka saltpot-making workshop sa National Museum of the Philippines (NMP)-Bohol nga nagdani sa pagtagad sa lumad nga Asin Tibuok.
Gibanner isip “Hulma”, ang master potter’s guided workshop sa Bohol’s pottery heritage usa ka serye nga gipahigayon sa pakigtambayayong sa Center for Culture and Arts Development (CCAD) sa kagamhanang probinsiyal.
Ang inisyatiba nahiuyon usab sa tema karong tuiga sa National Heritage Month Celebration: “Championing Heritage: Capacity Building to Transform Communities.”
Ang kalihokan gisugdan pinaagi sa mga plenary session nga gipahigayon sa NMP-Bohol kaniadtong Mayo 10 uban sa mga partisipante partikular na sa mga tinun-an gikan sa nagkadaiyang tunghaan sa Bohol.
Ang mga sesyon naglakip sa komprehensibo nga lecture nga naglangkob sa nagkalain-laing aspeto sa pottery art ug disenyo nga adunay hands-on nga demonstrasyon ug workshop.
Si Alexandra De Leon, NMP archaeology division senior museum researcher, naghisgot sa paghubad sa nangagi pinaagi sa pottery samtang si Rhayan Melendres, University of the Philippines professor, naghisgot sa Bohol ceramic traditions ug ethno archaeological research sa Visayas.
Ang lokal nga historyador ug propesor nga si Marianito Jose Luspo mipresentar sa biswal nga mga motibo sa pre-hispanic nga pottery sa Bohol ug si Aba Lluch Dalena, usa ka inila nga multi-faceted artist, mihatag sa iyang testimonya sa yutan-ong mga sinugdanan sa artistikong mga ekspresyon.
Nagdugang sa nagpadayon nga paningkamot sa pagpabuhi sa tradisyon sa paghimo og asin sa Asin Tibuok, si Gobernador Erico Aristotle Aumentado mihatag sa iyang mensahe sa suporta nga gihatag ni Joanne Pinat, Bohol Provincial Tourism Office officer-in-charge.
“Anaa na karon sa atong paghulma sa atong asoy pinaagi sa pagpanalipod sa importanteng intangible cultural heritage sama sa Asin Tibuok ug sa salt-pot making tradition sa ku’n, nga sa pagkakaron namiligro,” matod ni Aumentado.
Dugang pa niya nga sa tinguha sa Bohol nga mahimong maalamon, lig-on, ug inklusibo nga lalawigan ubos sa Strategic Change Agenda sa kagamhanang probinsiyal, iyang gidasig nga dili lang palambuon ang lokal nga ekonomiya ug katilingban, apan pauswagon ug ipataas usab ang kulturang Boholano.
Usa ka panawagan alang sa pagpabuhi sa mga tradisyon sa pottery sa Bohol, ang workshop magpadayon sa mga batakang teknik sa clay molding kagahapon Mayo 11 ug usa ka masterclass sa paghimo sa saltpot nga gipahigayon sa Albuquerque.
Usa ka mother’s day special sa ‘Hulma: Hinulma sa Gugma ni Nanay” ang ipahigayon usab karong adlawa Mayo 12 sa NMP-Bohol, nga salmotan uban sa mga inahan nga naglakip ni Dalena ug multi-disciplinary artist, Yllang Montenegro.
Si Rachelle Lacea, NMP-Bohol office head, mihatag sa welcome remarks ug statement of purpose; Athena Vitor sa Bohol Arts and Cultural Heritage Council; Jan Roneal Elorde, Albuquerque planning assistant; Mark Steven Pandan, Holy Name University College of Education faculty; Si Ralph Vincent Centillas sa Bohol Island State University, ug si Dalena mihatag og mga panabut atol sa open forum. (RTB)
