NAKAKUHA ang una nga babayeng magbabalaod sa Segundo distrito sa Bohol sa very good satisfaction performance rating nga +67% sigon sa gipagawas nga resulta sa Holy Name University-Bohol Poll (March 23-April 22, 2024) survey.
Kahinumduman nga si CongW. Vanessa ‘Vanvan’ Cadorna-Aumentado sa nakalabay nga tuig (2023) nakakuha og performance rating nga +62%.
Subay niini miingon si CongW. Vanvan nga nalipay siya tungod kay dunay pagsaka sa iyang performance rating nga +5%.
“With my 2-year leadership as your Cong. in Second District of Bohol, lipay kaayo ta nga mas napalapdan pa nato ang atong pagserbisyo”, sigon pa sa kongresista.
Sangko langit usab ang pasalamat ni CongW. Vanvan sa pagsalig sa tanang taga segundo distrito sa iyang liderato, diniyos nga serbisyo, ug pagpatuman sa mga proyekto.
Gipasabot sa magbabalaod nga nagpamatuod kining +67% nga nakita sa iyang mga konstitwenti ang iyang paningkamot.
Dugang ni CongW. Vanvan nga tungod niini mas inspirado siya nga mas maningkamot pa aron mabati sa bagang-doot sa mga katawhan ang iyang serbisyo, programa, ug proyekto.
“More works to do, more Barangays to visit pa, mao pasensya sa uban huwat-huwat lang pohon dili makaya sa powers kas-ahon… hehehe… but getting there sa kasuok-suokan pohon,” apasumpay sa kongresista.
Nasayran nga bisan gani bag-o pa nakapanganak ang kongresista, apan wala kini makapugong kaniya alang sa iyang personal nga pagbisita sa mga katawhan sa distrito ug personal nga pag-supervised sa mga serbisyo ug proyekto tunghod sa iyang kasibot sa pagpangalagad.
Gani bisan kon una pa kini niya nga termino isip magbabalaod, apan minilyon na nga mga infrastructure projects sa iyang napatuman wala pay labot ang iyang minilyon nga medical assistance program sa mga kabos nga nanginahanglan ug daghanan pang serbisyo. (RTB)
