SUBAY sa pagsugod na sa local nga kampanya, gibutyag sa labing labaw nga bokal sa lalawigan ug kandidato pagka bise-gobernador ubos sa pundok ABante Bohol Dr. Dionisio Victor Balite nga iyang gihigugma ang mga Bol-anon sa tibook niyang kalag, tibook kasing-kasibng, ug tibook huna-huna.
Sumala ni SBM Balite nga sulod sa hapit na unom ka mga tuig nga gipili siya isip bokal sa ikatulong distrito sa Bohol, siya matinud-anon nga mibuhat sa iyang trabaho sa pagserbisyo sa tanan.
Gipasabot ni Balite nga sa kanunay iyang gihatag ang iyang kaugalingon ug kasingkasing alang sa pagserbisyo ug pag-alagad sa tanan.
Gipaningkamotan sa labing labaw nga bokal sa Bohol nga mabuhat niya ang iyang gimithi para sa tanang Bol-non.
“Mao nga karong umaabot Mayo 9, 2022, ubani ug supportahi ako ninyo sa akong pag- ABante isip Bise-Gobernador sa atong lalawigan”, suma pa ni Balite.
Nanawagan usab kini sa tanan alang sa suporta sa iyang mga kaubanan sa ABante Bohol kansang mithi mao ang Limpyo nga pang Gobyerno alang sa kaayohan sa Bohol ug unahon gyud ang mga Bol-anon sa dili pa ang kaugalingon.
“Kini si Dr. Dionisio Victor Ancog Balite, sa kanunay naglagiti ang akong pagbati ninjong mga Bol-anong pumipili”, apasumpay niini. (RTB)
