MUKABAAT sa 13 ka mga mayor sa Bohol ang mitambong sa paglusad kaniadtong Marso 24, 2022 sa usa ka Krusada Alang sa Limpyong Panggobyerno para sa mga Bol-anon (Crusade for Good Governance for the Boholanos).
Ang launching gipahigayon sa JJs seafood Village sa dakbayan sa Tagbilaran nga gitambongan nila ni Clarin Mayor Eugene Ibarra, Getafe Mayor Casoy Camacho, Jagna Mayor Joseph Ranola, Dimiao Mayor Randolph L. Ang, San Isidro Mayor Dadz Naraga Gementiza , Lila Mayor Arturo Jed Piollo II, Loboc Mayor Leon Calipusan, Panglao Mayor Leonila Paredes Montero, Ubay Mayor Costan Reyes, Buenavista Mayor Dave Duallo, Sevilla Mayor Juliet Dano, Garcia Hernandez Mayor Tita V. Baja ug Candijay Mayor Christopher Tutor.
Ang mga mayor mipadayag ug mibatbat sa giingong mga anomaliya ug mga dili maayo nilang kasinatian sa pagpadagan ni Governor Art Yap sa kagamhanang probinsiyal sama sa corruption, walay klarong tabang sa katawhan nga naigo sa pandemya ug sa bagyong Odette, duwa sa politika ug uban pa.
Gipaniguro sa mga mayor nga human sa launching ipadayon ang information and education campaign aron masabtan sa mga Bol-anon ang mga kausaban nga angayang makab-ot pinaagi niining krusada.
Ipadayon nila ang pagkombinser sa mga kaigsuonang Bol-anon nga mopaluyo sa maong kawsa ug sila sa tagsatagsa ka mga lungsod mopasabot sa katawhan sa tumong ug tinguha sa kawsa.
Matod sa mga mayor nga duna pay ubang mga mayor nga wa makatambong ang mipadayag na sa pagsuporta sa krusada samtang duna say ubang mga mayor nga matod pa nila nagpahilom-hilom lang nga andam usab sa pagsuporta sa krusada alang sa limpyong panggobyerno para sa mga Bol-anon.
Si Loboc Mayor Leon Calipusan miingon nga nalipay siya nga anaa ang mga taga media kay siya nagtuo nga ang maka counter sa kuwarta nga ipabaha sa ilang mga kaatbang ang mga tinuod nga istorya nga isulti ug ipahibawo sa media ngadto sa katawhan.
Kay kon makasabot ang mga tawo sa sitwasyon, bisan pag pilay kuwarta sa ilang mga kaatbang dili kini makabuntog sa gugma sa mga Bol-anon, dugang ni Calipusan. (RTB)
