MOLUNGTAD pa hangtod sunod buwan Mayo 2024, ang nasinati nga grabeng kainit sa adlaw ug kaigang sa kagabhion sa tibook Bohol.
Miingon ang Philippine Atmospheric, Geophysical, and Astronomical Services Administration (Pagasa) Bohol, nga wa silay nakitang weather disturbance sa mosunod nga lima ka adlaw.
Matod ni Pagasa Bohol officer-in-charge (OIC) Engr. Nards Samar nga gipanglantawan ang mas grabe nga init nga masinati sa Mayo.
Base sa natala sa ilahang weather system, anaa sa 26-33 degree Celsius ang daily average nga kainiton nga nasinati karon. Kon basehan ang heat index, moabot kini sa 40 degree celsius.
Karong tuiga, natala naidtong Abril 6, ang labing init nga temperature sa tibook Bohol diin anaa kini sa 34.4 degree Celsius.
Apan, matod ni Samar gipanglatawan nila nga moabot pa sa 42-43 degree Celsius ang heat index sa Mayo diin mao kini ang “danger” level.
Pasidaan sa weather company nga ang kritikal nga oras ala 1:00 ug alas 2:00 sa hapon. Tambag ni Samar nga kinahanglan nga di molapas sa 20 minutos ang pagbuwad sa init.
Nasayran usab nga zero ang chance nga uwan sa mosunod nga mga semana. Karon nga anaa kasagaran sa balay ang publiko, magkuha kini og tualya niya bas-on og tubig aron itrapo sa parte sa lawas nga dali nga mainitan susama sa liog, ilok ug uban pa.
Sagad sa mga sakit panahon sa ting-init mao ang heat cramps, heat exhaustion, ug heat stroke.
EASTERLIES
Padayong makasinati og kaalimuot ug init nga panahon ang Bohol tungod sa pagpatigbabaw sa Easterlies sa umaabot nga mga adlaw, matod sa state weather bureau.
Kini nakapasamot sa naglungtad nga hulaw tungod sa El Niño phenomenon ug sa nagpadayon nga uga, ting-init nga panahon, sumala sa mga eksperto sa Philippine Atmospheric, Geophysical and Astronomical Services Administration (Pagasa).
Ang Easterlies sa tropikal nga mga nasod sama sa Pilipinas nagtumong sa hanging sidlakan nga nagdalag init, umog nga hangin gikan sa Dagat Pasipiko, nga moresulta sa alimuot ug init nga kahimtang.
Subay niini, ang weather componay niawhag sa publiko nga mag-amping, sama sa pagpabiling hydrated, tungod kay ang taas nga heat index gilauman nga magpadayon sa tibuok semana. (RTB)
