NAGMUGNA si Gobernador Aris Aumentado og task force aron tan-awon ang dinalian nga mga kabalaka sa Alona beach area taliwala sa nagkakusog nga singgit sa paglimpyo sa atubangan sa baybayon ilabi na sa pagdagsa sa mga turista atol niining summer vacation.
Ang “Task Force Alona” gipatawag karong bag-o samtang iyang gihinganlan si Panglao Mayor Boy Arcay nga maoy mangulo sa task force diin ang gobernador maoy iyang co-chair.
Sigon sa gobernador ang task force mopaspas sa pagpatuman sa walo ka dagkong mga kabalaka sa Alona beach zone nga naglakip sa paghunong sa mga kalihokan sa pagpamaligya nga adunay mga lamesa ug lingkoranan nga dili na gitugotan nga madala sa mga baybayon ug pagbira sa mga dive boat ug mga bangka nga nagpundo sa Alona area.
Ang duha ka labing dinalian nga mga kabalaka atimanon sa “Task Force Alona” sa tinguha nga wagtangon ang mga dagkong talan-awon sa atubangan sa baybayon.
Kinahanglan usab nga aksyonan ang pagdili sa mga binuhi, pagdili sa mga piknik nga magdala sa ilang pagkaon sa baybayon samtang ang pagmasahe sa mga baybayon higpit usab nga gidili sa gawas sa ilang gitudlo nga mga lugar.
Ilabi na nga hunongon usab ang pagpahigayon sa fire dancing ug fireworks display sa mga baybayon.
Ang gobernador nagkanayon nga ang “Task Force Alona” mokuha sa Provincial Tourism Council (PTC) nga gipangulohan ni manlalaban Doy Nunag isip secretariat.
KOMPOSISYON
Matud ni Gobernador Aumentado nga ang task force usa ka 14-man team diin ang mayor maoy mangulo.
Ang mga sakop sa task force mao ang: Municipal Environment and Natural Resources Officer (MENRO), mga representante gikan sa Panglao Municipal Tourism Office, Municipal Engineer’s Office/Building Official, Bohol Prov’l Environment & Management Office, Provincial Tourism Office, Environment Management Bureau (DENR), Phil. Coast Guard, Phil. National Police, Panglao PNP, Panglao Tourist Police, PNP-Maritime Group, Maritime Industry Authority (MARINA), Dept of Interior and Local Govt (DILG), ug Dept of Public Works and Highways (DPWH).
Ang nasangpit nga kamandoan mi-epekto dayon, sumala sa Executive Order sa gobernador.
UNANG ADLAW
Si Gobernador Aumentado niingon nga ang Task Force Panglao mihatag og usa ka semana nga information drive sa dili pa ipatuman ang clean-up drive sa Alona beach sugod ugma Abril 22, 2024. (RTB)
