GIPAHIBAWO sa ikaduhang labing-labaw nga opisyal sa Bohol nga ang Department of Agriculture (DA) gikatakdang mohatag og ‘fuel subsidies’ sa mga mag-uuma ug mangingisda nga apektado sa pagsaka sa presyo sa lana.
Matod ni bise-gobernador Dr. Dionisio Victor A. Balite, Ph.D, ang kantidad sa hinabang nga ihatag sa matag benepisyaryo mokabat sa P3,000 nga matod niya usa lang ka higayon nga tabang gikan sa DA.
Gipasabot ni VG Balite nga sa pagkakaron, gi-adjust na sa DA ang guidelines sa pag-apod-apod sa fuel subsidy ug gipaabot nga mapagawas na ang fuel assistance alang sa mga mangingisda ug mag-uuma sa umaabot nga mga semana labi na dinhi sa Bohol.
Una sa tanan, ang DA nigahin ug dul-an sa P1 bilyones nga kantidad sa pundo para sa mga kwalipikadong benepisyaryo sa tibuok nasud, dugang pamahayag ni Balite.
Sigon pa sa bise-gobernador nga ang P500 milyones gigahin usab alang sa mga mag-uuma nga nanag-iya og makinarya, ug PHP500 milyones alang sa mga mangingisda sa nasud.
Gibutyag pa ni Balite nga lakip sa mga kwalipikadong benepisyaryo mao ang mga mag-uuma nga adunay makinarya nga narehistro ubos sa Registry System for Basic Sectors in Agriculture (RSBSA), ingon man ang mga mangingisda kansang boat tonnage dili molapas sa 3 metriko tonelada.
Si VG Balite mao usab ang chairman sa komitiba sa agrikultura sa Sangguniang Panlalawigan (SP) sa Bohol hangtud sa tuig 2025. (RTB)
