KAHUGPONGAN sa mga private schools nagpatuman og nagkadaiyang learning modalities paglikay sa epekto sa kainit sa panahon, ang uban kanila nagpatuman og online classes.
Sa unang higayon gipahigayon sa gawas sa NCR ug karong tuiga sa Dakbayan sa Sugbo ang panagtigom sa di momenus 200 ka miyembro sa Federation of Associations of Private Schools and Administrators kon FAPSA nga gitambongan usab sa mga opisyal sa Department of Education (DepEd).
Giangkon nila nga grabe ang kainit sa panahon ug apektado ang kalihokan sa ilang mga eskwelahan busa mipatuman usab sila og mga pamaagi aron dili mahimutang sa peligro ang mga tinun-an.
Sa usa ka tunghaan sa lungsod sa Compostela, ang mga magtutudlo ra ang anaa sa classrooms nga nag atubang computer sa ilang pagtudlo sa mga tinun-an nga atoa sa mga pinuy-anan.
Ang Regional Director sa DepEd Dr. Salustiano Jimenez, nibutyag nga ilang gi-respeto ang pagsuspenso sa face to face classes sa pipila ka mga Local Government Unit sa REhiyun-7 kay gitan-aw usab nila kun unsa ang makaayo sa mga tinun-an subay sa nasinati karon nga hilabihan nga kainit sa panahon. (RTB)
