TAGBILARAN CITY, Bohol (PIA) –Gikan sa 20 ka kalungsuran nga mingduso na sa ilang hinaguan nga Local Public Transport Route Plan (LPTRP), subay sa lagda sa balaod, mi-uswag na ngadto sa 37 karon ang may naduso na nga mga plano aron makabukas nag bag-o nga mga ruta nga magpasulod na og mga sakyanan de-pasaheroan sa mga kabarangayan sa Bohol.
Kini maoy gibutyag ni Provincial planning Officer Atty John Vistal, didto sa Capitol Reports diha nga gipadayag ang mga kalambuan kabahin sa local nga panakyanan sa Bohol.
Gipahigayon ang Capitol Reports kabahin sa panakyanan sa mandu ni Gob Erico Aristotle Aumentado, aron kahatagan na og solbad ang kamahal sa pletehan sa Bohol, tungod usab kay napakyas ang mga nag-unang mga napili nga opisyales sa kalungsuran sa pagmugna sa ilang kaugalingong LPTRP.
Ang LPTRP maoy basehan sa Land Transportation Franchising and Regulatory Board (LTFRB) sa pagaprobar sa mga aplikasyon sa mga operators sa sakyanan nga depasahero-an nga magsugod og mga byahe sa natumbok nga mga ruta.
Ang LPTRP usa ka plano nga gibase sa pagtuon sa mga kalungsuran sa kadaghanon sa mga pasahero sa usa ka ruta, ang gikinahanglan nga mga sakyanan nga makabyahe subay usab sa matang sa karsada nga maagi-an.
Ang mga kalungsuran maoy mas nasayud sa kalidad sa ilang panakyanan, mao nga sila ang magplano, ug dinhi sa ilang plano, ibase sa LTFRB ang pag-aproba sa kadaghanon ug matang sa mga sakyanan nga pabyaheon, matud pa ni LTFRB Transportation Planning Officer Eugenio Ebo, Jr., didto sa nahisgutang programa.
Dugang ni Atty Vistal, sa 37 ka mga kalungsuran nga aduna nay nahimo nga plano, may pipila na nga nahatagan sa Notice of Compliance subay sa bag-ong Public Utility Vehicles Modernization Plan (PUVMP), may pipila pa usab nga gipahimoan pag rebisyon samtang may 12 pa ka kalungsuran ang wala pag naduso nga mga plano.
Tungod niini, mihangyo ang mga tinugyanan sa Kapitolyo nga humanon na sa mga kalungsuran ang ilang kaugalingon nga mga LPTRP, aron kon may sakyanan de pasaheroan na nga makasulod, wala nay makapataka og bungat sa mga pletehan, tungod kay illegal nga namasahero sa wala pay ruta, ug kon regular na nga may mag-agi-an, masolbad na usab ang pagdagsang sa mahal nga habal-habal.
Mahimo na usab nga madakop kon may mga ilegal nga namasahero sa mga ruta nga walay nakuha nga prangkisa gikan sa LTFRB. (rahc/PIA_7/Bohol)
