“AYAW tuo diha-diha dayon nga midaug ka sa online bisan kon wala ka muapil sa ilang raffle aron dili ka mahulog sa lungag sa kapakyasan!”
Kini ang gipahinumdom sa ikaduhang labing-labaw nga opsiyal sa tibook Bohol sa publiko subay sa mga online notice nga nagpahibalo nga ikaw nakadaog og mga premyo gikan sa mga institusyon o establisemento tungod sa mga promosyon nunot niining nagkadool nga adlaw sa gugma o valentine’s day.
Sumala pa ni bise-gobernador Dr. Dionisio Victor A, Balite, Ph.D nga kinahanglang dili ‘i-klik’ ang mga link gikan sa kadudahang pahibalo isip usa ka pamaagi aron maangkon ang premyo.
Sigon ni BG Balite pangutan-a una ang imung kaugalingon kon ngano nga midaug ka sa usa ka raffle online nga wala man ikaw muapil sa ilang bisan unsa nga promotional activities?
Gihangyu sa bise-gobernador ang publiko sa kanunay nga pagtawag sa gituohang mga institusyon o mga establisemento alang sa pagmatuud sa dili pa mutoo dayon tungod kay dunay mga tawo nga magpahimulos sa higayon aron lang makabiktima sa isig ka tawo.
“Kinahanglan nga magmatngon ang tanang Bol-anon ilabi na nga ang tanan polos nagsagubang sa kalisdanan tungod sa epekto sa nakalabay nga pandemya’, dugang ni BG Balite. (RTB)
