NISAYAW na ang propaganda sa telebisyon ug social media nga usbon ang Batakang Balaud nga mao ang 1987 Philippine Constitution.
Charter Change kun “Cha-Cha” maoy dakong kampanya karon ilabina sa telebisyon nga klarong makita sa katawhang Pilipinhon, kay kasagaran ana-a na may mga tv ang kabalayan.
Sa nigawas nga taho sa tv, ana-a matud pa’y nagpasiugda og “signature campaign” o pagpangita’g mga tawo nga mopirma isip barometro sa gilaumang “People’s Initiatives”.
Apan gihimakak kini sa giingong mga nagpaluyo niini.
Suma sa nigawas nga mga balita, ang House Speaker nga si Martin Romualdez, kinsa ig-agaw og tagsa ni Presidente Bongbong Marcos Jr., maoy usa sa gustong mausob ang 1987 Constitution, nga namugna usa ka tuig human nalagpot sa Malakanyang ang giilang diktador nga Pangulo kaniadto nga si Presidente Ferdinand Marcos Sr – amahan ni PBBM.
Sa nigawas usab nga istorya dinhi sa atong pamantalaan, gipaagi og ayuda ug trabaho ang diskarte sa mga politikong nagduso sa Cha-Cha.
Sa ordinaryong katawhan, wala kini nila makita o masabti nga posibleng gipaagi gayud sa ayuda ug trabaho sa gobyerno sama sa AICS ug TUPAD ug uban pa ang ilang estratehiya, kay ang mga magbabalaod nga maoy naghatag niining maong mga grasya o ang gipalatayan niini, mao na’y mohangyo sa katawhan inig abot sa maong takna.
Ang ana-a sa hunahuna sa katawhan nga mabuhi sila pinaagi sa mga ayuda ug dinaliang trabaho sama sa TUPAD.
Apan niining maong mga pasumangil, sayon kining ilingo-lingo sa mga politiko nga anaay motibo sa Cha-Cha.
Kinsa ba diay mabulahan kon mausob ang 1987 Constitution?
Ana-a ang pangagpas nga usa kini ka pagpanimalos sa mga Marcos aron papason ang bati nga kasaysayan sa amahang Marcos, kay nahimo man ang 1987 Constitution panahon ni Presidente Cory Aquino – ang mortal nga kaatbang sa politika ni Marcos Sr.
Nahimong Presidente si Cory tungod sa pagkamatay ni kanhi Senador Ninoy Aquino diin gialegar nga si Marcos Sr. maoy utok sa maong kamatayon.
Nahimong kusog usab ni Cory ang EDSA People Power sa iyang pagkalingkod sa maong trono.
Sa laktud, unang makabenepisyo ang mga Marcos kon magmalampuson ang Cha-Cha, nga gisuwayan usab sa niaging administrasyon apan napakyas.
Suma sa mga taho, anaay pipila ka mga probisyones sa kasamtangang Batakang Balaud nga alid-an kay dili na haum sa panahon karon.
Mga politiko ug lider maoy numero-unong makapahimulos kon mahitabo kini. Ikaduha ang mga negosyante ug ang ubang nasud nga anaay interes kon mabag-o ang Konstitusyon.
Apan kadaghanan sa mga Pinoy, ilabina ang matag Juan dela Cruz, walay interes niini.
Atong timan-an, gubot ang sistema sa atong pamolitika ug pang-gobyerno dinhi, naglibog kita kon kinsa’y tuohan ug kinsa’y dili. Anaay daghang mga lipat-lipat. Sa malipat lang.
Hinuon, kon makaayo gayud sa katawhan ang Cha-Cha, walay lugar ang dili pagsuporta niini.
Manghinaot lang kita nga i-bandera sa mga politiko kon unsay usbon ug unsay idugang sa atong Batakang Balaud. Makaayo ba o dili ilabina sa ekonomiya sa ordinaryong tawo.
Niining maong istorya, sa atong mga kamot ilabina kanatong mga pobre, nakadepende ang paghukom. It takes two to CHA-CHA. Walay mahimo ang mga politiko kon wala ang pag-uyon sa katawhan.
Timan-i lang pud ang giingon nila, wala ra ba kuno’y magmahay nga mag-una. Kay sa sayaw ra ba nga Cha-Cha, lisod kon anaay matumban. Dili na magkadima-o.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
