TAGBILARAN CITY, Bohol Jan 4 (PIA) – Bugtong ang lalawigan sa Bohol alang sa Central Visayas ang lalawigan nga nakakuha sa ‘Beyond Complaint’ rating sa National Disaster and Risk Reduction Council Gawad Kalasag 2023, nga gitunol sa miaging semana.
Kini human nakuha na sa Bohol pinaagi sa iyang Provincial Disaster and Risk Reduction Management Council (PDRRMC) ug ang executive arm niini nga Telephone and Radio Systems Integrated Emergency Response (TARSIER 117) ang full compliant rating sa pila na ka tuig ang milabay.
Ang Gawad Kalasag (Kalamidad at Sakuna Labanan, Sariling Galing ang Kaligtasan) maoy matag tuig nga highlight sa National Disaster Consciousness Month (NDCM), ug naghatag og pag-ila, pagpasidungog ug pag-pahalipay sa mga local disaster coordinating councils, non-government organizations, private organizations, ug stakeholders sa ilang dili hingtupngan nga serbisyo ug tampo alang sa Disaster Risk Management (DRM) ug Humanitarian Assistance.
Mismo si Gobernador Erico Aristotle Aumentado kauban sa mga representante sa TARSIER 117 ang mingdawat sa pasidungog gikan mismo ni NDRRMC ug Defenbse Secretary Gilberto Teodoro Jr.
Gawas sa lalawigan Bohol, lima usab ka lungsod ang mingdawat sa susamang pasidungog dihang nakakuha usab ang ilang mga LDRRMC sa Beyond Complaint Rating.
Ang mga LDRRMC sa Alburquerque, Anda, Candijay, Sikatuna ug Tagbilaran City, nakakuha usab sa napataas nga pasidungog human nahimo silang sobra pa sa nagtuman sa gilagda sa balaod.
Sila Alburquerque Mayor Don Ritchie Buates, Anda Mayor Angelina Simacio, Candijay Mayor Thamar Olaivar, Sikatuna Mayor Justiniana Ellorimo ug Tagbilaran City Mayor Jane Yap mingdawat sa ilang mga pasidungod alang sa ilang mga konseho nga nakapakita nga dili lamang pisikal nga disaster council ang ilang napatukod kon dili aktibo ug functional nga bahan sa mga boluntaryo nga nagpa-panginlabut sa ilang mga komunidad sa DRM.
Lain pa usab nga 28 ka mga LDRRMC sa Bohol ang natimbang ug nahatagan sa fully compliant rating niining tuiga. (rahc/PIA-7/Bohol)
Gidawat ni Gob Erico Aristotle Aumentado kauban sa mga representante sa Tarsier 117 ang plake gikan mismo ni NDRRMC chair ug DND Sec Gilberto Teodoro Jr. ug DILG Secretary Benhur Abalos agi og pag-ila sa PDRRMC sa Bohol nga aktibo ug nagbuhat sa sobra sa gipangayo sa balaod alang sa DRRM ug humanitarian nga kalihukan. (PIAbohol)
