LIG-ON kaayo ang pundasyon nga nahimo ni Gobernador Aris Aumentado sa katawhang Bol-anon: pagsalig.
Iyang napundar ang grabeng pagsalig nga gihatag sa katawhan kaniya tungod sa iyang sinsero nga pagpangalagad pinaagi sa pagpaduol sa iyang kaugalingon sa dughan sa masa.
Ang paghatud sa de kalidad nga serbisyo-publiko sa tugkaran mismo sa iyang mga agalon nga mao ang katawhang Bol-anon, maoy naghatag og dako kaayong bintaha kaniya ilabina sa gustong moatbang sa 2025.
Ang pagkapukan ni kanhi Gobernador Art Yap sa kamot sa anak nga Aumentado usa ka bushing testamento kon unsa ka kusog ang mga Aumentado.
Gihimadlan na sa mga eksperto sa politika nga mahuman ni Aris ang tulo (3) ka termino isip gobernador.
Mao kini karon ang dakong hagit sa gustong mohagit kaniya sa umaabot Piniliay — unsa nga estratehiya ang gamiton nga wala man nagsilbi ang salapi ug makinarya sa niaging administrasyon.
Kon ang kuwarta ug makinarya wala nisaril, ang pagpanlimbong na lang maoy katapusang ikabangga sa moatbang ni Aris. Kay kon popularidad usab ang hisgutan, gigunitan kana ni Aumentado.
Apan dali kining mapugngan sa kampo sa mga Aumentado ilabina ana-a ni Aris ang gahum.
Kay kon sa sugal pa, inilog kaayo si Aris.
Kon kinsa man ang (mga) moatbang, gipangagpas nga hangaton gayud sa maong lumba.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
