ANG Philippine Economic Zone Authority (PEZA) nagtinguha sa pagbutang sa usa ka ‘special economic zone’ sa Bohol nga gilaumang magdala sa dugang mga investors, maka-hatag ug dugang job opportunities ug mupalambo sa economic growth ilabi na nga apektado sa krisis ang lungsod tungod sa pandemya.
Gibutyag sa kanhi Mayor ug karon Konsehal sa Panglao Nanay Leonila ‘Nila’ Montero nga ang PEZA mitumbok sa Panglao isip ‘viable location’ sa maong special economic zone sa Bohol.
Gipasabot ni Montero nga ang Panglao adunay potential nga dili lang limitado sa turismo kon dili nag-una usab kini nga kandidata sa pagpahigayon sa ‘business space’ ilabi na nga anaa nahimutang ang Bohol Panglao International Airport (BPIA).
Nasayran ni Montero nga ang PEZA nagsugod na sa pagtoon sa nakalabay nga tuig sa viability sa giproponer nga proyekto.
Sigon sa konsehal nga gipasalig usab sa PEZA nga muhatag kini sa tanang gikinahanglang technical preparations aron makadani sa dugang mga investors.
Gawas sa PBIA, usa usab ka pantalan ang ipahiluna sa Panglao isip key element nga masulod sa usa ka special economic zone.
Nasayran usab ni Montero nga ang PEZA mubukas sa mga economic zones sa ubang mga lalawigan ug ang Panglao sa Bohol napili isip top candidate. (RTB)
