MEDITASYON, hilom nga pag-ampo, o pag-ampo segun sa Mateo 6:6 – “Kon mag-ampo kamo, adto sa lawak. Takpi ang pultahan ug pag-ampo sa Amahan nga nag-uban kaninyo sa tago. Ang Amahan nga nakakita sa tago, moganti kaninyo”.
Karong panahona diin daghan kita’g gisagubang nga kakulian sa kinabuhi: pandemya, bagyong Odette, gubat sa Europe tali sa Russia ug Ukraine, ug mga personal natong mga suliran, labing gikinahanglan nato ang meditasyon.
Labaw sa tanan, angayan gayud kitang mag-meditate aron giyahan kita sa hustong pagpili sa mga angay magdumala sa atong nasud, probinsya ug kalungsoran karong umaabut nga Mayo 9. Daghan ang hulga sa pagpamalit og boto ug mga pagpanglingla pinaagi sa Facebook, Youtube, ug uban pa.
Tungod sa kakulangan sa pag-ampo, daghan ang nailad sa mga bakak nga gipakatap sa social media. Gani, nahimatikdan na sa mga ekspertong tigpaniid nga ang mga yawan-ong pwersa naghiusa aron pag-ilad sa katawhan ug pagpatuo sa ilang mga bakak. Kini maoy hinungdan nga ang Simbahan mismo mibarug na aron isabwag ang kahayag sa kamatuoran inubanan sa tiunayng pag-ampo.
Ang meditasyon usa ka labing halawom ug makahuloganong matang sa pag-ampo. Unsaon kini pagpahigayon?
- Sulod sa imong lawak diin adunay kahilom ug dili ka madisturbo.
- Paglingkod sa silya, itul-id ang imong likud, apan ayaw isandig sa silya. Ang tiil ipahiluna nga flat sa salog. Ang kamot o palad ipahiluna sa matag paa.
- Sa inanay, i-relax ang tibuok lawas, sugod sa ulo paingon sa tiil.
- Ang mga mata i-relax usab, apan ipunting sa salog, duha ka dangaw gikan sa taliwala sa imong mga tiil.
- Sa inanay usab, ginhawag lawom, katulo ngadto sa ka-pito ka higayon, hangtud nga ma-relax na ang imong tibuok lawas.
- Kon nakarelax ka na, human sa lawom nga ginhawa, ipiyung ang imong mga mata.
- Samtang nagpiyung ka, obserbahi ang pagsulod-gawas sa hangin sa buho sa imong ilong atul sa imong natural nga pagginahawa.
- Sa imong pag-inhale ilituk sa imong hunahuna kini nga mga pulong: “Ginoo kaloy-i kami”. Ug sa imong pag-exhale: “Kristo kaloy-i kami”. Ipadayon kini hangtud sa kawhaan ngadto sa katloan ka minutos.
- Kon mawala ka sa focus, o maglaag ang imong hunahuna sa laing mga butang, ibalik lang kini sa pag-inhale ug exhale nga may gilituk sa hunahuna lamang.
Kini nga matang sa pag-ampo makahupay sa kinahiladman ug seguradong dunggon sa Labawng Makagagahum. Buhata kini, kutob sa imong mahimo, matag buntag sa imong pagmata ug sa gabii sa padulong kang matulog. Kyrie eleison, Christe eleison!
