GIPAHIBALO karong bag-o sa mga tagdumala sa BOHECO I & II ug sa Bohol Light Company Incorporated (BLCI) nga dunay pag-usbaw sa ilang electricity rates alang sa bill niini gikan sa Oktubre ngadto sa Nobyembre.
Sumala maong mga power utilities, nga ang usbaw anha ipahamtang sa mga residential customers nga moabot P0.13 sentimos nga pagsaka sa average rate sa nahisgotan nga billing period.
Gipasabot nila nga ang pagsaka sa presyo sa krudo sa world market, ingon man usab sa pag-usbaw sa transmission charges sa National Grid Corporation of the Philippines (NGCP) maoy rason sa pagsaka sab sa singil.
Gusto man sa tulo ka power utilities nga paubsan ang bayranan sa kuryente tungod sa krisis karon, apan maglisod sila paghimo niini gumikan kay dili nila kontrol ang presyo sa krudo ug uban nila nga tinubdan sa world market.
Gipahibalo usab sa tulo ka kompanya nga padayon sila nga nagtanyag og ‘payment arrangements’ alang sa ilang mga kustomer nga dili maka-full og bayad sa ilang mga bill. (RTB)
