TAGBILARAN CITY, Bohol (PIA) – Usa ka rebranding sa tanan nga mga suroy Bohol nga kalihukan ang gitug-an karon sa Bohol Tourism Office (BTO) nga makapa-usab na sa kasagarang panglantaw sa unsa ang kasinati-an sa turismo nga buot sa mga tinugyanan nga mahitabo sa Bohol.
Didto sa Kapihan sa PIA, gibutyag ni BTO officer in charge Joanne Pinat nga nunot sa pagkakuha sa Bohol sa designation isip lakip na sa network sa 159 ka mga global geoparks, ang panglantaw nga ipatunhay ang kaanindot ug kabililhon sa kinaiyahan ug mga talagsaon nga buhilaman sa Bohol nahilakip na sa konsiderasyon sa matunhayon nga pagsuroy.
Panahon na nga ipakita nato ang Bohol nga dili lang one time, big time nga destinasyon, ug unta masabtan usab kini sa mga tourism stakeholders nga nagpadagan sa mga tours, dayag ni Pinat, kinsa bag-o lamang minghulip sa nabakante nga nga pwesto sa Bohol Tourism Officer.
Si Pinat hinuon, kanhi sumusunod sa ranggo sa kanhi tourism officer nga mingretiro na sa katungdanan, ug sayud sa mga pamaagi sa Bohol ug nakasinati usab sa mga lakang aron maneguro nga ang turismo mapahaum sa malungtarong pagpadagan alang sa malungtarong kalikopan.
Kahinumduman nga ang Bohol natanyagan sa designation nga ilakip na sa global geoparks sa United nationsl Educational, Scientific and Cultural Organization (UNESCO), isip lugar nga mahimong buhing laboratoryo sa mga scientists, researchers ug mga turista nga buot mosinati sa mga talagsaon nga natural nga talan-awon ug buhilaman dinhi.
Ang designation isip Geopark sa Bohol, nagsukad usab sa maayong pagdumala niini sa nga kalikopan ug mga importante nga kabilin nga kabtangan, ug mahimo nga mabawi kini human sa upat ka tuig, kon mapamatud-an nga may pagtamhang nga nahitabo nga nakadaut na hinuon sa kalikopan.
Gikan sa kasamtangan nga mga tours, aduna na kita’y geo trail alang sa kabaskog sa lawas (fitness), geo trails sa adventures, geocircuits sa pagkaon sama sa kasinati-an nga mamupo sa umahan ug mangaon gikan niini, kasinati-an sa organikong pagkaon, may geo-circuit sa mga karaang simbahan nga tubod sa pagtuo, saysay ni Pinat.
Subay usab niini, padayon nga gipatuman sa BTO kauban sa Department of Tourism ang mga bansaybansay aron mapadangat ngadto sa mga turista ang serbisyo nga tatak Bol-anon ug Pilipinhon.
Niini, matud pa sa BTO, mas gikinahanglan sa Bohol ang matang sa mga turista nga walay kaikag sa pagatiman sa kalikopan, mao nga kon moluntad man galling ang tuyo, kinahanglan ang turismo nga nahaum sa malungtaron nga kalihukan. (PIAbohol)
