PABILIN nga anaa sa 90 porsento sa mga benepisyaryo sa Pantawid Pamilyang Pilipino Program (4P’s) sa gobyerno ang anaa gihapon sa kabus nga kahimtang.
Mao kini ang resulta sa gihimong Performance Audit Report (PAR) sa Commission on Audit (COA) base sa “Follow-Up on Performance Audit sa Pantawid Pamilyang Pilipino Program’’, nga sulod sa pito hangtud 13 ka tuig nga programa sa gobyerno.
Kini ang reyalidad bisan paman ang Department of Social Welfare and Development nipagawas og binilyon nga pondo kada tuig para matabangan ang mga pamilya nga anaa sa poverty line.
Matud sa COA, bisan paman og sige magdawat ang benipesyaryo og pay-outs sa dugay nga panahon,anaa lang gihapon sa 90% ang nagkalisod tungod kay kasagaran nila nagsalig lang sa tabang, wala nangita og paagi nga makapangita’g gamay nga negosyo para panginabuhian.
Sa performance audit sa COA, sa nasangpit nga programa, anaa sa 3,820,012 sa 4,262,439 ka aktibong 4Ps beneficiaries gikan 7-13 ka tuig, nakadawat na og P537.39 bilyong cash grants hangtud niadtong Hunyo 30, 2022.
Ang report sa COA, sukwahi sa gipagawas usab sa DSWD nga nag-ingong niadtong Hulyo nga anaa sa 1.3-M nga pamilyang benepisyaryo sa 4Ps ang tangtangon na sa listahan tungod kay gikonsiderar kini nga wala na nagkalisod.
Gikatakda nga e-revise ni DSWD Secretary Erwin Tulfo ang 4Ps Law (Republic Act No. 11310), diin limitado nalang sa pito ka tuig ang paghatag sa benepisyo ubos sa maong programa.
Tungod niini, gibanabana nga adunay 2.6 ka milyon nga estudyante nga nabenipisyuhan sa 4Ps ang dili na makahuman sa ilang pag-eskwela. (RTB)
