MAS gipalapdan pa ang Disaster Response Management human nibisita sa Kapitolyo ang mga kadagkuan sa DSWD Central Office ug Central Visayas.
Mahitungod kini sa paspas nga paghatud sa mga food packs ug uban pa ngadto sa mga nagkinahanglan kon dunay kalamidad, o kadaot sa panahon sama sa Habagat, bagyo, gale warning ug uban pa.
Dunay i-deploy sa DSWD ngadto sa Kagamhanang Probinsyal nga mga suplay arun mas dali ang pagpang-apud niini sa mga biktima sa katalagman.
Kini suma pa kang DSWD Special Assistant to the Secretary for Disaster Response Management Ma. Isabel Lanada.
Hangyo usab sa Kagamhanang Probinsyal nga mabutangan og DSWD Satellite Office sulod sa Kapitolyo.
Ang Covered Court sa Provincial Engineer’s Office ug ang lawak sa PDRRMO ilang gi-inspect arun masuta kon mahimo ba kining bodega nga sudlan sa mga suplay.
Kauban nila S.A.S Lanada mao sila DSWD-7 Disaster Response Management Division Chief Lilibeth Cabiara, DSWD-7 Warehouse Manager Leo Hontanosas ug Information Manager Ojharra Manlosa. (Kahlil Lester O. Camba)
