Ni Wilson Auguis Subrio
NIKABAT og P1,199,113.75 ang kinatibuk-ang nahatud sa Kagamhanang Probinsyal sa Bohol (PGBh) sa unom (6) ka mga barangay sa lungsod sa Buenavista.
Mao kini ang gipaambit ni Gobernador Aris Aumentado sa social media.
“Nipahigayon sa pagduaw ug kukabildo ang mga opisyales sa Kagamhanang Probinsyal, pinanguluhan sa akong ngalan ni Bise Gobernador Dionisio Victor Balite, sa Barangay Lapacan Norte, Lungsod sa Buenavista aron makighinabi sa katawhan ug itunol usab ang mga financial assistance alang sa unom ka mga barangay didto sa Lapacan Norte Multi-Purpose Center,” matud ni Gov. Aumentado.
“Nagkantidad ang mga ayuda og P1,199,113.75, ug gamiton kini sa mga barangay alang sa ilang mga nagkadaiyang proyekto ug aktibidad. Kuyog ni BG Balite sila Bokal Jamie Aumentado-Villamor ug Executive Assistant Jun Flores,” dugang sa gobernador.
Ani-a ang 6 ka mga benepisyaryong barangay:
Brgy. Puting Bato, Buenavista – P340,000 alang sa konstruksyon sa Multi-Purpose Building. Gikan kini sa buhatan sa gobernador, ni Bokal Villamor ug Tomas Abapo Jr.
Brgy. Nueva Montana, Buenavista – P263,113.75 alang sa paghuman sa ilang Covered Court. Gikan kini sa mga buhatan nila ni Bokal Villamor, Abapo, ug Romulo Cepedoza (ABC).
Brgy. Anonang, Buenavista – P240,000 alang sa Reconstruction of Training Center sa Sitio Pundokan. Gikan kini sa buhatan ni Aris ug ni Bokal Abapo.
Brgy. Lapacan Norte, Buenavista – P200,000 alang sa konstruksyon sa Solar Drier.
Brgy. Panghagban, Buenavista – P150,000 alang sa rehabilitasyon sa Communal Comfort Room sa Panghagban High School.
Brgy. Bantuan, Buenavista – P6,000 isip Sand and Gravel Shares sa barangay gikan sa Hulyo ngadto sa Disyembre 2022.
Nipahinumdom usab ang gobernador nga i-liquidate dayon ang nadawat nga mga tseke aron makadawat gihapon sa ubang mga tabang gikan sa Kagamhanang Probinsyal, ilabina ang P200,000 alang sa mga priority projects.
